چین میں کرونا وائرس کے 15 نئے کیسز رپورٹ
چین میں کرونا وائرس کے مزید 15 نئے کیسز رپورٹ ہوئے ہیں۔ نیشنل ہیلتھ کمیشن کی جانب سے جمعرات کو جاری بیان میں کہا گیا ہے کہ 15 نئے کیسز میں سے ایک کیس اندرون ملک جب کہ باقی 14 کیسز بیرونِ ملک سے چین منتقل ہوئے ہیں۔
چین میں وبائی مرض کی علامات ظاہر ہوئے بغیر یعنی ایسمٹومیٹک کیسز کو کرونا وائرس کا مرض شمار نہیں کیا جاتا۔
جان پاپکنز یونیورسٹی کے اعداد و شمار کے مطابق چین میں کرونا وائرس کے تصدیق شدہ کیسز کی مجموعی تعداد 91 ہزار 752 ہو گئی ہے جب کہ اس وبائی مرض سے اب تک چار ہزار 742 افراد ہلاک ہوئے ہیں۔
پاکستان میں موسمِ سرما میں کرونا کی شدت بڑھنے کا خطرہ
پاکستان میں کرونا وائرس کی دوسری لہر کے پیش نظر ملک بھر میں عوامی مقامات پر ماسک کے استعمال کو لازمی قرار دے دیا گیا ہے۔ ماہرین کا کہنا ہے کہ اگر حفاظتی اقدامات کو بروقت بروئے کار نہ لایا گیا تو موسم سرما میں یہ بیماری خطرناک حد تک شدت اختیار کر سکتی ہے۔ دیکھیے نذرالاسلام کی رپورٹ۔
برطانیہ میں ہلاکتوں کی تعداد 50 ہزار سے تجاوز کر گئی
برطانیہ میں کرونا وائرس کے کیسز میں مسلسل اضافہ ہو رہا ہے جب کہ ملک بھر ہلاک افراد کی کل تعداد 50 ہزار 457 ہو گئی ہے۔
برطانوی حکومت کی جانب سے جاری اعداد و شمار کے مطابق بدھ کو مزید 22 ہزار 950 افراد میں وائرس کی تصدیق ہوئی ہے۔
جان ہاپکنز یونیورسٹی کے مطابق برطانیہ میں اب تک 12 لاکھ 60 ہزار سے زیادہ کیسز رپورٹ ہو چکے ہیں اور برطانیہ میں ہلاکتیں یورپ کے کسی بھی ملک میں مقابلے میں سب سے زیادہ ہیں۔
برطانوی وزیرِ اعظم بورس جانسن کا کہنا ہے کہ برطانیہ ابھی خطرے سے باہر نہیں نکلا ہے۔ عالمی وبا سے ہونے والی ہر موت افسوس ناک ہے اور ہم دنیا سے جانے والے ہر فرد کے لیے غمگین ہیں۔
یاد رہے کہ کرونا کی دوسری لہر کے باعث برطانیہ میں ایک ماہ کا لاک ڈاؤن نافذ ہے۔
پاکستان میں 22 جولائی کے بعد سب سے زیادہ اموات رپورٹ
پاکستان میں گزشتہ چوبیس گھنٹوں کے دوران کرونا وائرس کے شکار مزید 37 مریض دم توڑ گئے ہیں جس کے بعد ہلاکتوں کی کل تعداد سات ہزار 92 تک پہنچ گئی ہے۔
پاکستان میں 22 جولائی کو 38 اموات ریکارڈ کی گئی تھیں جس کے بعد اتنی زیادہ اموات رپورٹ ہوئی ہیں۔
سرکاری اعداد و شمار کے مطابق گزشتہ چوبیس گھنٹوں میں 36 ہزار 923 ٹیسٹ کیے گئے جب کہ 2304 افراد میں وائرس کی تشخیص ہوئی ہے۔
حکام کے مطابق کرونا وائرس کے زیرِ علاج 1219 افراد کی حالت تشویش ناک ہے۔
یاد رہے کہ گزشتہ دو ہفتوں کے دوران پاکستان میں کرونا کیسز اور اموات کی تعداد میں مسلسل اضافہ ریکارڈ کیا گیا ہے جسے دیکھتے ہوئے حکومت نے شادی ہالوں میں ان ڈور تقریب پر پابندی سمیت متاثرہ علاقوں کو سیل کرنے کا فیصلہ کیا ہے۔