امریکہ: بے روزگاری الاؤنس کے لیے سات لاکھ 42 ہزار نئی درخواستیں
امریکی محکمہ محنت نے جمعرات کو کہا ہے کہ ملک میں کرونا وائرس کے بڑھتے ہوئے مریضوں کے ساتھ ساتھ گزشتہ ہفتے بے روزگاری الاؤنس کے لیے درخواست دینے والوں میں بھی اضافہ ہوا ہے، جس سے دنیا کی سب سے بڑی معیشت کو ایک نئے خطرے کا سامنا ہے۔
لیبر ڈیپارٹمنٹ کی رپورٹ کے مطابق سات لاکھ 42 ہزار بے روزگار افراد نے الاؤنس کے حصول کے لیے نئی درخواستیں دائر کیں ہیں۔ جو کہ گزشتہ ہفتے کے مقابلے میں 31 ہزار زیادہ ہیں۔ یہ مسلسل پانچواں ہفتہ ہے جب کہ بے روزگاری الاؤنس کے لیے درخواست دینے والوں کی تعداد سات لاکھ سے زیادہ ہے۔
محکمہ محنت کا کہنا ہے کہ کل چھ اعشاریہ چار ملین افراد بے روزگار ہیں، جب کہ نومبر کے پہلے ہفتے بے روزگاری کی شرح چار اعشاریہ تین فی صد تھی۔
بے روزگاری کی شرح میں اپریل کے مقابلے میں نمایاں کمی ہوئی ہے۔ اپریل میں بے روزگاری کی شرح 14 اعشاریہ سات فیصد تھی۔ تاہم امریکہ میں کرونا وائرس کے ایک لاکھ 70 ہزار نئے متاثرین کے اندراج کے بعد، مختلف ریاستوں کے گورنروں اور میئرز نے کاروباری سرگرمیوں پر نئی قدغنیں عائد کرنا شروع کر دی ہیں، جنہیں مہینوں پہلے وائرس متاثرین میں کمی کے بعد نرم کر دیا گیا تھا۔
کینیڈا میں کیسز میں مسلسل اضافہ، اسپتالوں میں جگہ کم پڑنے کا اندیشہ
کینیڈا کے وزیرِ اعظم جسٹن ٹروڈو نے خبردار کیا ہے کہ کرونا وائرس کے مریضوں میں ہونے والے اضافے کے باعث رواں سال کے اختتام تک اسپتالوں میں جگہ کم پڑ سکتی ہے۔
ملک میں جاری کرونا وائرس کی دوسری لہر سے متعلق جمعے کو جسٹن ٹروڈو نے اپیل کی کہ لوگ جس حد تک ممکن ہو، گھروں میں رہیں۔
کینیڈا کے اہم شہر ٹورنٹو میں بھی مکمل لاک ڈاؤن نافذ کیے جانے کی تیاریاں کی جا رہی ہیں۔
قبل ازیں چیف پبلک ہیلتھ افسر تھریسا ٹام کا کہنا تھا کہ برے ترین حالات میں لوگوں نے میل جول بڑھایا تو یومیہ کیسز کی تعداد 60 ہزار تک جا سکتی ہے۔
تھریسا کا مزید کہنا تھا کہ تقریبات کے انعقاد پر اس وقت عائد کردہ پابندیوں کے باوجود 31 دسمبر تک یومیہ کیسز کی تعداد 20 ہزار تک پہنچ سکتی ہے۔ جو کہ اس وقت پانچ ہزار یومیہ کیسز سے کم ہے۔
امریکہ کی 'جان ہاپکنز یونیورسٹی' کے مطابق کینیڈا میں اب تک تین لاکھ 24 ہزار سے زائد افراد اس وبا سے متاثر ہو چکے ہیں۔ جب کہ 11 ہزار سے زائد اموات ہوئی ہیں۔
نئی دہلی کے اسپتالوں میں جگہ کم پڑنے لگی
عالمی وبا سے امریکہ کے بعد سب سے زیادہ متاثرہ ملک بھارت کے دارالحکومت نئی دہلی میں کرونا وائرس کے یومیہ کیسز میں مسلسل اضافہ ہو رہا ہے۔
وزارتِ صحت کے مطابق دہلی میں حالیہ ہفتوں کے دوران اوسطاََ چھ ہزار 700 یومیہ کیسز رپورٹ کیے جا رہے ہیں۔ جب کہ اسپتالوں میں انتہائی نگہداشت کے وارڈز اور شمشان گھاٹوں میں جگہ کم پڑنے لگی ہے۔
ماہرین کا کہنا ہے کہ دہلی میں دیوالی کے بعد آئندہ دو ہفتے اہم ہیں۔
بھارت میں چوبیس گھنٹوں کے دوران مزید 46 ہزار سے زائد افراد میں کرونا وائرس کی تشخیص کی گئی ہے۔
وائرس کے سبب ہفتے کو مزید 564 افراد کی ہلاکت رپورٹ کی گئی۔ جس کے بعد اس وبا کے سبب ہونے والی اموات کی تعداد ایک لاکھ 32 ہزار سے تجاوز کر چکی ہے۔
بھارت کی دو ریاستوں مدھیہ پردیش اور گجرات کے آٹھ شہروں میں ہفتے سے رات کے اوقات میں کرفیو نافذ کرنے کا اعلان کیا گیا ہے۔