کرونا وائرس کی ممکنہ ویکسین کتنی مؤثر اور مفید ہے؟
ادویہ ساز کمپنیوں کی جانب سے کرونا وائرس کی ویکسینز کے 90 فی صد سے زیادہ مؤثر ہونے کا دعویٰ لوگوں میں امید تو پیدا کر رہا ہے، لیکن ناقدین کا کہنا ہے کہ سائنٹیفک کمیونٹی کی جانب سے ڈیٹا کے تجزیے کے بغیر یہ محض کسی کمپنی کے اپنی پروڈکٹ کے بارے میں بلند و بانگ دعوؤں سے کم نہیں۔ صبا شاہ خان کی رپورٹ۔
کرونا لاک ڈاؤن کے باوجود گرین ہاؤس گیسوں اور گلوبل وارمنگ میں اضافہ جاری
موسمیات سے متعلق عالمی تنظیم ورلڈ میٹرولوجیکل آرگنائزیشن نے کہا ہے کہ کرونا وائرس کی وجہ سے دنیا بھر میں کیے جانے والے لاک ڈاؤنز کے باوجود زمین کے کرۂ ہوائی میں گرین ہاؤس گیسوں کے اخراج میں کوئی کمی نہیں ہوئی اور یہ اخراج اپنی ریکارڈ سطح تک پہنچ گیا ہے۔
یہ انکشاف تنظیم نے فضا میں کاربن ڈائی آکسائیڈ اور دیگر گرین ہاؤس گیسوں کے حجم سے متعلق اپنی سالانہ رپورٹ میں کیا ہے۔
کرونا وائرس کی عالمی وبا سے منسلک لاک ڈاؤن کی وجہ سے بھارت، چین اور دیگر کئی ممالک کے بڑے شہروں میں ماحولیاتی آلودگی میں کچھ کمی ہوئی ہے۔ تاہم عالمی تنظیم کا کہنا ہے کہ ان اقدامات کے باوجود گرین ہاؤس گیسوں کے مسلسل اخراج میں کمی نہیں ہوئی جس سے کرہ ارض کے درجہ حرارت میں اضافہ جاری ہے۔
رپورٹ میں کہا گیا ہے کہ بڑھتے ہوئے درجہ حرارت کی وجہ سے برف کے تیزی سے پگھلنے، سمندروں میں پانی کی سطح بلند ہونے اور شدید موسمی تغیرات جیسے واقعات تواتر سے رونما ہو رہے ہیں۔
کرونا وائرس کی پہلی تین ویکسین، کتنی مختلف اور کتنی مؤثر ہیں
کرونا وائرس سے بچاؤ کے لیے تیسرے مرحلے کے انسانی تجربات کے بعد اب تک تین مؤثر ویکسینز سامنے آ چکی ہیں، جس سے یہ امید پیدا ہو گئی ہے کہ اب جلد ہی اس موذی مرض کے پھیلاؤ پر قابو پا لیا جائے گا۔
ان ویکسینز کے متعلق اب تک جتنی بھی معلومات سامنے آئی ہیں، وہ اُنہیں بنانے والی کمپنیوں کی جانب سے ہی جاری کی گئی ہیں جب کہ ان کے مکمل نتائج کی تفصیلات اب تک منظرِ عام پر نہیں آئیں۔
یہ ویکسینز دوا ساز کمپنیوں ایسٹرازینیکا، موڈرنا اور تیسری ویکسن فائزر اور بائیو این ٹیک نے مشترکہ طور پر تیار کی ہے۔
امریکہ میں کرونا کے ریکارڈ مریض اسپتالوں میں داخل
امریکہ میں ایک روز کے دوران کرونا وائرس کے ریکارڈ مریض اسپتالوں میں داخل ہوئے ہیں۔
کووڈ ٹریکنگ پروجیکٹ کے اعداد و شمار کے مطابق امریکہ میں منگل کو کرونا کے شکار 88 ہزار 80 مریض مختلف اسپتالوں میں داخل ہوئے ہیں۔ امریکہ میں عالمی وبا کے پھیلاؤ سے اب تک اسپتالوں میں داخل ہونے والے مریضوں کی یہ ریکارڈ تعداد ہے۔
منگل کو امریکہ میں 17 لاکھ 85 ہزار سے زائد افراد کے کرونا ٹیسٹ کیے گئے جن میں سے ایک لاکھ 66 ہزار سے زیادہ افراد میں وائرس کی تشخیص ہوئی ہے۔
عالمی وبا سے سب سے زیادہ متاثرہ ملک امریکہ میں اب تک ایک کروڑ 25 لاکھ سے زیادہ کیسز اور دو لاکھ 59 ہزار سے زیادہ اموات رپورٹ ہو چکی ہیں۔