پاکستان میں ٹیسٹ مثبت آنے کی شرح میں اضافہ
پاکستان میں کرونا وائرس کے ٹیسٹ مثبت آنے کی شرح 6.9 ہو گئی ہے۔
سرکاری اعداد و شمار کے مطابق پاکستان میں کرونا وائرس کے ٹیسٹ مثبت آنے کی شرح میں مسلسل اضافہ ہو رہا ہے۔ گزشتہ روز ملک بھر میں کیے گئے ٹیسٹس میں سے 7.01 مثبت آئے تھے جب کہ اس سے ایک دن قبل 6.31 فی صد ٹیسٹ مثبت رپورٹ ہوئے تھے۔
رواں ماہ ایک جانب ملک بھر میں کیے جانے والے ٹیسٹوں کی تعداد میں اضافہ ہو رہا ہے تو دوسری جانب ٹیسٹ مثبت آنے کی شرح بھی بڑھ گئی ہے۔
سرکاری اعداد و شمار کے مطابق پاکستان میں اکتوبر کے وسط تک ٹیسٹ مثبت آنے کی شرح 1.08 فی صد سے 2.2 فی صد کے درمیان تھی۔
سندھ میں کرونا کے خلاف احتیاطی تدابیر نظر انداز
پاکستان کے صوبہ سندھ میں باقی ملک کے مقابلے میں کرونا وائرس کے سب سے زیادہ کیسز سامنے آ رہے ہیں۔ لیکن عوامی سطح پر اب بھی احتیاطی تدابیر پر عمل درآمد کم ہی ہو رہا ہے۔ مزید جانتے ہیں لاڑکانہ سے وائس آف امریکہ کے نمائندے محمد ثاقب کی اس رپورٹ میں۔
جرمنی میں 14 ہزار سے زائد افراد میں وائرس کی تشخیص
یورپ کے ملک جرمنی میں کرونا وائرس کیسز میں اضافہ دیکھا جا رہا ہے. سرکاری اعداد و شمار کے مطابق گزشتہ 24 گھنٹوں میں مزید 14 ہزار سے زائد افراد کے وائرس سے متاثر ہونے کی تشخیص ہوئی ہے۔
جرمنی کے وبائی امراض سے متعلق ادارے ‘آر کے آئی’ کے جاری کردہ اعداد و شمار کے مطابق اب تک 10 لاکھ 42 ہزار سے زائد افراد وبا سے متاثر ہو چکے ہیں۔
آر کے آئی کے مطابق گزشتہ 24 گھنٹوں میں وبا کے باعث مزید 158 اموات رپورٹ کی گئیں۔
جرمنی میں مہلک وبا کے باعث ہونے والی اموات کی تعداد 16 ہزار 123 ہو چکی ہے۔