نیویارک میں اسکول کھولنے کا اعلان
امریکہ کی ریاست نیویارک کے شہر نیویارک سٹی کے اسکول مرحلہ وار کھولنے اور کرونا ٹیسٹ کی تعداد بڑھانے کا اعلان کیا گیا ہے۔
نیویارک کے میئر بل دی بلاسیو نے بذریعہ ٹوئٹ اعلان کیا کہ سات دسمبر سے ایلیمنٹری کلاسز میں تعلیمی سلسلے کو بحال کیا جا رہا ہے جب کہ دس دسمبر سے 75 اسکولوں میں تعلیمی کلاسز طلبہ کے لیے کھول دی جائیں گی۔
یاد رہے کہ نیویارک میں ستمبر کے آخر اور اکتوبر کے اوائل میں کرونا کیسز میں کمی کے بعد تعلیمی ادارے کھولے گئے تھے جب کہ رواں ماہ کیسز میں اضافے کے بعد اسکولوں میں طلبہ کی موجودگی پر ایک مرتبہ پھر پابندی لگا دی گئی تھی۔
نیویارک کے شہریوں نے اسکول بند کرنے کے اقدام پر انتظامیہ کو کڑی تنقید کا نشانہ بنایا تھا اور کہا تھا کہ ریستوران اور بارز کو کھولنے کی اجازت دی گئی ہے اور اسکول بند کر دیے گئے ہیں۔
ویکسین کی خریداری کے لیے سفارشات تیار کرلیں: اسد عمر
پاکستان کے وفاقی وزیر برائے منصوبہ بندی اور کرونا وائرس کی انسداد کے لیے قائم کمیٹی نیشنل کمانڈ آپریشن سینٹر (این سی او سی) کے سربراہ اسد عمر کے مطابق کرونا ویکسین کی خریداری کے لیے سفارشات تیار کر لی ہیں۔
اسد عمر نے ایک ٹوئٹ میں کہا ہے کہ این سی او سی کی سفارشات کل کابینہ کے اجلاس میں منظوری کے لیے پیش کی جائیں گی۔
اُن کے بقول ڈاکٹر فیصل سلطان کی سربراہی میں ایک ٹیم نے ویکسین کی خریداری سے متعلق سفارشات مرتب کی ہیں جس پر آج بات چیت کے لیے حتمی شکل دی ہے۔
امریکہ میں کرونا لہر میں مزید اضافے کا خدشہ
امریکہ میں وبائی امراض کے ماہر ڈاکٹر انتھونی فاؤچی نے خبردار کیا ہے کہ آئندہ چند ہفتوں میں کرونا کیسز میں تیزی سے اضافہ ہو سکتا ہے۔
اے بی سی ٹی وی کے پروگرام 'دِس ویک' میں گفتگو کرتے ہوئے ڈاکٹر فاؤچی نے کہا کہ تھینکس گیونگ کی حالیہ چھٹی کے بعد ہمیں کرونا وائرس کے پھیلاؤ میں اضافے کا سامنا ہو گا۔
ڈاکٹر فاؤچی نے ایسے موقع پر خبردار کیا ہے جب امریکہ میں صرف نومبر میں 40 لاکھ سے زیادہ کیسز رپورٹ ہوئے ہیں جو گزشتہ ماہ کے مقابلے میں تقریباً ڈیڑھ گنا تعداد زیادہ ہے۔
امریکہ میں ماہِ اکتوبر میں لگ بھگ 19 لاکھ کیسز رپورٹ ہوئے تھے۔
جان ہاپکنز یونیورسٹی کے اعداد و شمار کے مطابق امریکہ میں عالمی وبا سے اب تک لگ بھگ دو لاکھ 67 ہزار اموات اور ایک کروڑ 37 لاکھ سے زیادہ کیسز رپورٹ ہو چکے ہیں۔
سری لنکا: جیل میں کرونا سے پریشان قیدیوں کا ہنگامہ، 8 ہلاک
سری لنکا کے دارالحکومت کولمبو کی ایک جیل میں ہونے والے فساد پر قابو پانے کے لیے جیل کے محافظوں کی فائرنگ سے آٹھ قیدی ہلاک اور 59 زخمی ہو گئے ہیں۔
سری لنکا کی جیلوں میں جہاں گنجائش سے کہیں زیادہ قیدی رکھے جا رہے ہیں، کرونا وائرس کی عالمی وبا کی وجہ سے بے چینی پائی جاتی ہے۔
حالیہ ہفتوں میں ملک کی متعدد جیلوں میں کرونا وائرس کے بڑھتے ہوئے مریضوں کی وجہ سے قیدیوں نے احتجاج کیا۔
پولیس کے ترجمان اجیت روحانہ کا کہنا تھا کہ اتوار کو کولمبو سے 10 میل دور ماہارا جیل میں قیدیوں نے ہنگامہ شروع کیا تو ڈیوٹی پر موجود اہلکاروں نے صورت حال کو قابو پانے کی کوشش کی۔