امریکہ میں ایک میں ہفتے میں ریکارڈ یومیہ اوسط اموات
امریکہ میں گزشتہ ہفتے ریکارڈ یومیہ اوسط اموات ہوئی ہیں۔
رپورٹس کے مطابق امریکہ میں گزشتہ ہفتے یومیہ اوسطاََ 2249 افراد کرونا وائرس کے باعث ہلاک ہوئے ہیں۔
یہ امریکہ میں کسی بھی ہفتے میں یومیہ اموات کی بلند ترین شرح ہے۔ قبل ازیں رواں برس اپریل کے دوسرے ہفتے میں یومیہ 2232 اموات کی شرح ریکارڈ کی گئی تھی۔
واضح رہے کہ ہفتے کے اعداد و شمار کا اوسط زیادہ بہتر انداز میں وبا کے پھیلنے کی نشان دہی کرتا ہے۔
امریکہ میں حالیہ ہفتوں میں کرونا وبا ایک بار پھر تیزی سے پھیلنے لگی ہے اور لوگوں کے متاثر ہونے کی تعداد اور اموات میں اضافہ ہوا ہے۔
احتیاطی تدابیر کے ساتھ کرسمس کی تیاریاں
دنیا بھر میں مسیحی مذہبی تہوار کرسمس کی تیاریاں جوش و خروش سے جاری ہیں۔
کہیں لوگ کرسمس ٹری خرید کر گھر لے جا رہے ہیں تو کہیں سجاوٹ کا کام جاری ہے۔ البتہ اس دوران کرونا وائرس کے حوالے سے جاری احتیاطی تدابیر کا بھی خیال رکھا جا رہا ہے۔
امریکہ کے شہر نیویارک میں بھی کرسمس کی تیاریاں جاری ہیں۔ لوگ کرسمس ٹری خرید کر گھر لے جا رہے ہیں اور اس کی سجاوٹ کر رہے ہیں۔
وبا کے دوران صحت کی بہتری کے لیے انوکھا طریقہ
فرانس کے ایک علاقے میں لوگوں نے کرونا وائرس کی وبا کے دوران صحت کی بہتری کے لیے درخت پر کپڑے اور فیس ماسک لٹکائے ہوئے ہیں۔
اس درخت کو 'ہیلنگ ٹری' یعنی زخم بھرنے والا درخت بھی کہا جاتا ہے۔
کچھ لوگوں کا ماننا ہے کہ اس درخت پر کپڑے لٹکانے سے صحت اچھی رہتی ہے۔
لوگ اس درخت پر ایک قدیم روایت کے طور پر اپنے کپڑے لٹکاتے ہیں۔
بائیڈن کی ترجیحات میں 10 کروڑ ویکسین اور اسکول کھولنا شامل
امریکہ کے نومنتخب صدر جو بائیڈن نے کرونا وائرس کے انسداد کے لیے عہدہ سنبھالنے کے ابتدائی 100 روز کے دوران کیے جانے والے اقدامات کا عہد کیا ہے۔
منگل کو ماہرینِ صحت پر مشتمل اپنی ٹیم کا تعارف کراتے ہوئے بائیڈن نے کہا کہ وہ عہدہ سنبھالنے کے بعد ابتدائی 100 روز کے دوران ملک بھر میں رضاکارانہ طور پر ماسک پہننے کی آگاہی، دس کروڑ ویکسین لگانے اور ملک کے بیشتر اسکولوں کو کھولنے کا عہد کرتے ہیں۔
انہوں نے کہا کہ عالمی وبا تمام امریکیوں کے لیے اجتماعی تکلیف ہے اور اس پر قابو پانے اور شہریوں کی زندگی بچانے کے لیے ہم اجتماعی فیصلے کریں گے۔
بائیڈن کے بقول، "صدر ٹرمپ کی انتظامیہ کی جانب سے ویکسینیشن منصوبے میں میری ٹیم نے بعض خامیوں کی نشاندہی کی ہے۔"
انہوں نے کانگریس سے مطالبہ کیا کہ وہ آئندہ برس ویکسین کی فراہمی کے لیے مالی معاونت سے متعلق قانون سازی کریں تاکہ ویکسین کو لیبارٹری سے مریض تک فوری طور پر پہنچایا جائے۔
یاد رہے کہ امریکہ میں گزشتہ چند روز کے دوران اوسطاً دو لاکھ کیسز اور 2200 اموات رپورٹ ہوئی ہیں۔
عالمی وبا سے امریکہ میں اب تک ڈیڑھ کروڑ افراد متاثر اور دو لاکھ 86 ہزار سے زیادہ ہلاک ہو چکے ہیں۔