امریکہ میں دو لاکھ 75 ہزار قیدی وبا سے متاثر
امریکہ کے وفاقی جیلوں میں قید ہر پانچ قیدیوں میں سے ایک کرونا وائرس سے متاثر ہو چکا ہے۔ جو کہ عام عوام میں ہونے والی تشخیص کے مقابلے میں چار گنا زیادہ کیسز ہیں۔
امریکی خبر رساں ادارے 'ایسوسی ایٹڈ پریس' اور 'دی مارشل پروجیکٹ' کے مرتب کردہ اعداد و شمار کے مطابق امریکہ کی کچھ ریاستوں کی جیلوں میں قید نصف سے بھی زائد قیدی وبا سے متاثر ہو چکے ہیں۔
اعداد و شمار کے مطابق لگ بھگ 2 لاکھ 75 ہزار قیدیوں میں وائرس کی تشخیص اور 1700 سے زائد کے ہلاک ہونے کی تصدیق ہو چکی ہے۔
ریاست نیو یارک کی رائکرز آئر لینڈ جیل کے سابق چیف میڈیکل افسر ہومر وینٹرز کا کہنا تھا کہ کرونا وائرس سے متاثر ہونے والے قیدیوں کی تعداد اس سے زیادہ ہے۔
وائرس کی نئی قسم سامنے آنے پر برطانیہ سے ہالینڈ پروازوں پر پابندی
برطانیہ میں کرونا وائرس کی نئی قسم سے متاثرہ کیسز سامنے آنے کے بعد یورپ کے ملک ہالینڈ نے اتوار سے برطانیہ سے آنے والی پروازوں پر پابندی عائد کر دی ہے۔
برطانیہ میں پھیلنے والی کرونا وائرس کی نئی قسم سامنے آنے کے بعد حکام کی طرف سے کچھ علاقوں میں لوگوں کو گھروں میں رہنے کا حکم بھی جاری کیا گیا ہے جس کے بعد ہالینڈ نے یکم جنوری تک برطانیہ سے پروازوں کی آمد پر پابندی عائد کی ہے۔
ہالینڈ کی وزارتِ صحت کا ایک بیان میں کہنا ہے کہ برطانیہ میں سامنے آنے والی وبا کی نئی قسم زیادہ آسانی اور تیزی سے پھیلتی ہے جب کہ اس کی تشخیص بھی مشکل ہے۔
ہالینڈ کی کابینہ نے حفاظتی اقدامات کے طور پر برطانیہ سے آنے والی پروازوں پر پابندی عائد کی ہے۔ تاہم آمد و رفت کے دیگر ذرائع پر پابندی لگائے جانے سے متعلق فیصلہ زیرِ بحث ہے۔
خیال رہے کہ ہالینڈ میں کرونا وائرس کے پھیلاؤ کے پیشِ نظر آئندہ برس جنوری کے وسط تک پانچ ہفتوں کا لاک ڈاؤن نافذ ہے۔ جب کہ اسکول اور غیر ضروری اشیا کی دکانیں بھی بند ہیں۔
کرونا سے متاثرہ ممالک میں امریکہ بدستور سرفہرست
دنیا بھر میں کرونا وائرس سے متاثرہ افراد کی تعداد سات کروڑ 63 لاکھ سے تجاوز کر گئی۔
امریکہ کی 'جان ہاپکنز یونیورسٹی' کے اعداد و شمار کے مطابق دنیا بھر میں وبا سے سب سے زیادہ متاثر افراد کی تعداد امریکہ میں ہے۔ امریکہ میں کرونا وائرس سے ایک کروڑ 76 لاکھ افراد متاثر ہو چکے ہیں۔ جب کہ دوسرے نمبر پر بھارت میں ایک کروڑ جب کہ برازیل 72 لاکھ متاثرہ افراد کے ساتھ تیسرے نمبر پر ہے۔
امریکہ میں وبا سے نمٹنے کے لیے ممکنہ طور پر ایک ٹریلین ڈالر کے پیکیج پر قانون سازوں کی ووٹنگ کا امکان ہے۔
کرونا کی نئی شکل، یورپ اور مشرقِ وسطی کے کئی ممالک کی برطانیہ پر سفری پابندیاں
برطانیہ میں کرونا وائرس کی نئی قسم کے انکشاف کے بعد کئی یورپی اور مشرقِ وسطیٰ کے ممالک نے اس پر سفری پابندیاں عائد کر دی ہیں۔
صورتِ حال کا جائزہ لینے کے لیے برطانوی وزیر اعظم بورس جانسن نے پیر کو ہنگامی اجلاس طلب کر لیا ہے جس میں برطانیہ میں آمدورفت اور تجارتی سامان کی منتقلی سے متعلق اہم فیصلے متوقع ہیں۔
اتوار کو کئی یورپی ممالک بشمول فرانس، اٹلی، بیلجیم، نیدرلینڈ نے برطانیہ میں کرونا وائرس کی ایک اور نئی شکل اور اس کے تیزی سے پھیلنے کے شواہد ملنے پر سفری پابندیاں عائد کر دیں۔
اس کے بعد سعودی عرب، اسرائیل، کینیڈا اور کویت نے بھی اسی نوعیت کی پابندیاں عائد کر دی ہیں۔
عالمی ادارۂ صحت (ڈبلیو ایچ او) کا کہنا ہے کہ برطانیہ کے علاوہ وائرس کی اس نئی قسم کے نو کیسز ڈنمارک جب کہ ایک، ایک نیدر لینڈ اور آسٹریلیا میں رپورٹ ہوئے ہیں۔
برطانوی وزیرِ اعظم بورس جانسن کا کہنا ہے کہ وائرس کی نئی قسم 70 فی صد زیادہ تیزی سے ایک انسان سے دوسرے انسان میں منتقل ہونے کے شواہد ملے ہیں۔
اُن کا کہنا تھا کہ وہ حتمی طور پر کچھ نہیں کہہ سکتے کہ ویکسین اس وائرس کی اس نئی قسم کے خلاف بھی مؤثر ہو گی یا نہیں۔ تاہم سائنس دان اس کے ممکنہ اثرات کا جائزہ لے رہے ہیں۔