کرونا بحران: عالمی معیشت کو نقصان مگر کچھ کاروبار چمک اٹھے
کرونا وائرس سے دنیا بھر کی طرح پاکستان میں بھی بے روزگاری میں اضافہ ہوا جب کہ اشیائے ضروریہ کی قیمتیں بھی بڑھ گئی ہیں۔ لیکن کچھ لوگ ایسے بھی ہیں جن کا کاروبار متاثر ہونے کے بجائے ترقی کی جانب گامزن ہے۔ تفیصلات بتا رہے ہیں پشاور سے نذر الاسلام
جاپان: چار پریفیکچر کے گورنرز کا ہنگامی حالات کے نفاذ کا مطالبہ
جاپان کے دارالحکومت ٹوکیو اور اس کے قریبی تین پریفیکچرز کے گورنرز نے مرکزی حکومت سے مطالبہ کیا ہے کہ وہ کرونا وائرس کے پھیلاؤ کو روکنے کے لیے ایمر جنسی نافذ کرے۔
ٹوکیو کے گورنر یوریکو کوائیک نے دیگر تین گورنرز کے ہمراہ کرونا وائرس سے نمٹنے سے متعلق اقدامات کرنے والے وزیر سے ملاقات میں یہ مطالبہ کیا کہ وہ لوگوں کی زندگیاں محفوظ بنانے کے لیے ایمر جنسی نافذ کریں۔
جاپان میں حالیہ دنوں میں کرونا وائرس کے کیسز میں اضافہ دیکھا جا رہا ہے اور نیو ایئر پر ٹوکیو میں 1337 کیسز رپورٹ ہوئے۔
جاپان میں کرونا وائرس کی وجہ سے رواں سال جولائی میں منعقد ہونے والی اولمپکس سے متعلق خدشات میں اضافہ ہو رہا ہے۔ جس میں 11 ہزار اتھیلیٹس شرکت کریں گے۔
خیال رہے کہ جاپان میں اس وبا کے سبب اب 3500 سے زائد اموات ہو چکی ہیں۔
سعودی عرب نے سفری پابندیاں ختم کر دیں
سعودی عرب کی جانب سے گزشتہ ماہ برطانیہ میں کرونا کی نئی قسم سامنے آنے کے بعد ملک میں داخلے پر عائد پابندی ختم کر دی گئی ہے جس کے بعد بیرون ممالک سے سعودی عرب کے لیے فلائٹ آپریشن بھی بحال ہو گیا ہے۔
فلائٹ آپریشن کی بحالی کے بعد پاکستان سے سعودی عرب جانے والی پروازیں بھی بحال کر دی گئیں ہیں۔
سعودی حکام کے مطابق وائرس کی نئی قسم سے متاثرہ ممالک بشمول برطانیہ اور جنوبی افریقہ سے سعودی عرب میں داخلے کے خواہش مند مسافروں کو 14 روز ان ممالک سے باہر قرنطینہ میں گزارنا ہوں گے۔
چودہ روز بعد مسافر کو دوبارہ ٹیسٹ کرانا ہوں گے جس کے بعد وائرس فری مسافر کو ہی ملک میں آنے کی اجازت ہو گی۔
پاکستان کی قومی ایئر لائن کے حکام کے مطابق پابندی کے خاتمے کے بعد پاکستان سے سعودی عرب کے لیے فلائٹ آپریشن بحال کر دیا گیا ہے۔
روس میں آٹھ لاکھ افراد کو کرونا ویکسین لگا دی گئی
روس کے وزیرِ صحت میخائل موراشکو کا کہنا ہے کہ اب تک آٹھ لاکھ سے زائد افراد کو کرونا ویکسین لگائی جا چکی ہے۔
روس دنیا بھر میں کرونا وائرس سے متاثرہ مریضوں کی تعداد میں چوتھے نمبر پر ہے اور یہاں پچھلے سال دسمبر کے اوائل میں ‘اسپتنک فائیو' کرونا ویکسین لگانے کا عمل شروع کیا گیا تھا۔
روس میں رواں سال یکم جنوری سے کرونا ویکسین لگوانے والوں کا ڈیٹا بیس بنانے کے لیے ایک الیکٹرک ویکسی نیشن سرٹیفیکٹ جاری کیا جائے گا۔
اسپتنک ویکسین کی دو خوراکیں 21 دنوں کے وقفے سے لگائی جا رہی ہیں۔
روس میں ہفتے کو کرونا وائرس کے 26 ہزار سے زائد نئے کیس رپورٹ کیے گئے جس کے بعد اس وبا سے متاثرہ افراد کی تعداد 32 لاکھ سے تجاوز کر گئی ہے۔
کرونا وائرس کے سبب روس میں پچھلے 24 گھنٹوں کے دوران 447 اموات ہوئیں۔ وبا سے روس میں ہونے والی ہلاکتوں کی تعداد 58 ہزار سے زائد ہے۔