ویکسین ڈپلومیسی: بھارت ہمسایہ ملکوں کو مفت ویکسین فراہم کرنے کو تیار
بھارت مقامی سطح پر تیار کی جانے والی کرونا ویکسین ہمسایہ ملکوں کو بھی بھیجنے کی تیاری کر رہا ہے۔
بھارت کے 'سیرم انسٹی ٹیوٹ' کی تیار کردہ 'کووی شیلڈ' کی 20 لاکھ خوراکیں بیس جنوری کو بنگلہ دیش روانہ کی جائیں گی۔ بنگلہ دیش کے محکمۂ صحت کے ڈائریکٹر پروفیسر عبدالبشر محمد خورشید عالم نے بھی اس کی تصدیق کی ہے۔
میڈیا رپورٹس کے مطابق بھارت عنقریب افغانستان، نیپال، مالدیپ، میانمار، سری لنکا، بھوٹان اور ماریشس کو ویکسین فراہم کرے گا۔ تاہم اس فہرست میں پاکستان کا نام شامل نہیں ہے۔
بنگلہ دیش کے وزیرِ صحت زاہد ملک نے منگل کو نیوز کانفرنس میں بتایا کہ بھارتی حکومت 'کووی شیلڈ' کی خوراکیں بنگلہ دیش کو بطور تحفہ بھیج رہی ہے جس کے بعد 25 جنوری سے ویکسین کی کمرشل سپلائی شروع ہو گی۔
پاکستان کی منظور کردہ 'سائنو فارم' کرونا ویکسین کتنی مؤثر ہے؟
پاکستان نے کرونا وائرس سے نمٹنے کے لیے آکسفرڈ یونیورسٹی اور 'آسٹرازینیکا' کے بعد چین کے نیشنل فارماسوٹیکل گروپ 'سائنو فارم' کی تیاردہ کردہ ویکسین کے استعمال کی بھی اجازت دے دی ہے۔
کابینہ کمیٹی برائے کرونا ویکسین خریداری کے رکن اور وفاقی وزیر فواد چوہدری کا کہنا ہے کہ ابتدائی طور پر 'سائنو فارم' ویکسین کی خوراکیں حاصل کی جائیں گی۔
نیشنل کمانڈ اینڈ آپریشن سینٹر (این سی او سی) کے سربراہ اسد عمر کا کہنا ہے کہ کرونا وائرس کی ویکسین آنے میں وقت لگے گا۔
ویکسین اسپیشلسٹ کہتے ہیں کہ پاکستان میں منظور ہونے والی دونوں ویکسینز کا ٹرائل پاکستانیوں پر نہیں ہوا۔ چین کی جس ویکسین کا ٹرائل ہوا وہ مارچ میں پاکستان آنے کا امکان ہے۔
پاکستان کی وزارتِ صحت کے ذیلی ادارے ڈرگ ریگولیٹری اتھارٹی آف پاکستان (ڈریپ) نے چین کی تیارکردہ کرونا ویکسین 'سائنو فارم' اور برطانوی ویکسین 'آسٹرازینیکا' کے ایمرجنسی استعمال کی منظوری دے دی ہے۔
ڈریپ کی جانب سے گزشتہ روز جاری ہونے والے بیان کے مطابق چین کے نیشنل فارماسوٹیکل گروپ 'سائنو فارم' کی تیار کردہ ویکسین کے استعمال کی اجازت ڈریپ رجسٹریشن بورڈ کی جانب سے دی گئی جب کہ اس سے قبل 15 جنوری کو 'آسٹرازینیکا' کے ہنگامی استعمال کی منظوری دی گئی تھی۔
امریکہ میں ایک بار پھر ایک دن میں چار ہزار سے زائد اموات
امریکہ میں ایک بار پھر کرونا وائرس سے ایک دن میں چار ہزار سے زائد افراد ہلاک ہوئے ہیں۔
امریکہ کی 'جان ہاپکنز یونیورسٹی' کے اعداد و شمار کے مطابق گزشتہ 24 گھنٹوں میں ملک بھر میں 4377 افراد ہلاک ہوئے ہیں جس کے بعد اموات کی مجموعی تعداد چار لاکھ چھ ہزار 196 ہو گئی ہے۔
قبل ازیں امریکہ میں 12 جنوری کو 24 گھنٹوں کے دوران 4462 اموات ہوئی تھیں جو کہ ایک دن میں کسی امریکہ میں ہونے والی سب سے زیادہ ہلاکتیں ہیں۔
میڈیا رپورٹس کے مطابق امریکہ میں کرونا وائرس سے اموات جنگِ عظیم دوم میں ہلاک ہونے والے امریکیوں کی تعداد سے بڑھ چکی ہے۔
چین کا پاکستان کو 10 دن میں پانچ لاکھ ویکسین فراہمی کا وعدہ
پاکستان کے وزیرِ خارجہ شاہ محمود قریشی کا کہنا ہے کہ چین نے پاکستان کو بطور تحفہ پانچ لاکھ ویکسین ڈوزز 31 جنوری تک مہیا کرنے کا وعدہ کیا ہے۔ جب کہ پاکستان کی ضرورت کے مطابق 11 لاکھ ڈوزز فروری کے آخر تک مہیا کر دی جائیں گی۔
اسلام آباد میں میڈیا سے گفتگو میں وزیرِ خارجہ شاہ محمود قریشی کا کہنا تھا کہ ویکسین کی پہلی کھیپ چین جذبہ خیر سگالی کے تحت، تحفتاً بھیج رہا ہے۔
ہیلتھ کیئر ورکرز کے لیے 'سائنو فارم' ویکسین کی فراہمی کے حوالے سے شاہ محمود نے کہا کہ چین کے وزیرِ خارجہ نے فروری کے آخر تک 11 لاکھ ڈوزز فراہم کرنے کی یقین دہانی کرائی ہے۔
وزیرِ خارجہ نے کہا کہ چین کو چینی ویکسین 'کین سائنو' ویکسین کے ٹرائلز کی کامیابی سے آگاہ کیا ہے۔ اس کے ٹرائلز کی تکمیل کے بعد چین کے تعاون سے پاکستان میں یہ ویکسین تیار کرنے کا ارادہ ہے جس پر چین کے وزیرِ خارجہ نے آمادگی ظاہر کی ہے۔
واضح رہے کہ پاکستان نے حالیہ دنوں میں برطانیہ کی میں تیار کردہ ایسٹرازینیکا کی ویکسین اور چین میں تیار کردہ سائنو فارم کی ویکسین کی منظوری دی ہے۔
پاکستان نے سائنو فارم ویکسین کی 12 لاکھ ڈوزز کا آرڈر بھی دے دیا ہے۔ جب کہ نجی شعبے میں درآمد کنندگان کی بھی کئی غیر ملکی کمپنیوں سے بات چیت جاری ہے۔
پاکستان میں چین کی ویکسین 'کین سائنو' کے ٹرائلز ہوئے تھے جس میں 16 ہزار سے زائد افراد نے حصہ لیا۔ پاکستان اور چین کے ماہرین کے مطابق اب تک کے نتائج خاصے حوصلہ افزا سامنے ہیں۔