پاکستان میں پانچ لاکھ متاثرہ افراد صحت یاب
پاکستان میں کرونا وائرس سے متاثر ہونے والے پانچ لاکھ سے زائد افراد صحت یاب ہو چکے ہیں۔
سرکاری اعداد و شمار کے مطابق پاکستان میں گزشتہ 24 گھنٹوں میں وبا سے مزید 1220 افراد متاثر ہوئے ہیں جس کے بعد متاثرہ افراد کی مجموعی تعداد پانچ لاکھ 47 ہزار 648 ہو گئی ہے۔
اعداد و شمار کے مطابق پاکستان میں وبا سے متاثرہ پانچ لاکھ دو ہزار 537 افراد صحت یاب ہو چکے ہیں۔
کیا کرونا ویکسینز حاملہ خواتین کے لیے محفوظ ہیں؟
کرونا وائرس سے بچاؤ کے لیے تیار کردہ ویکسینز کو تجربات کے دوران حاملہ خواتین پر نہیں آزمایا گیا۔ تحقیق کے مطابق کرونا وائرس حاملہ خواتین کے لیے زیادہ خطرناک ثابت ہو سکتا ہے۔ ماہرین حاملہ خواتین کو کیا مشورہ دے رہے ہیں اور کیا کرونا ویکسینز ان کے استعمال کے لیے محفوظ ہیں؟ جانیے صبا شاہ خان سے۔
برطانیہ میں کرونا وائرس کی جنوبی افریقی قسم کے 105 کیسز رپورٹ
برطانیہ میں کرونا وائرس کی جنوبی افریقہ میں سامنے آنے والی نئی قسم کے 105 کیسز رپورٹ ہوئے ہیں جن میں سے 11 کیسز ایسے ہیں جن کا بیرونِ ملک سے آنے والے مسافروں سے کوئی تعلق نہیں ہے۔
برطانیہ کے وزیرِ صحت میٹ ہینکوک نے نیوز بریفنگ کے دوران بتایا کہ کرونا وائرس کی جنوبی افریقی قسم ملک میں تیزی سے پھیل رہی ہے۔ تاہم اب تک ایسے کوئی شواہد نہیں ملے جس کی بنیاد پر یہ کہا جائے کہ وائرس کی یہ قسم مہلک ہے۔
انہوں نے کہا کہ برطانوی حکومت کرونا وائرس کی نئی قسم پر قابو پانے کے لیے کوشاں ہے۔ اس سلسلے میں حکام نے متاثرہ علاقوں کے 80 ہزار رہائشیوں کے ٹیسٹ کرنے کا منصوبہ بنایا ہے۔
پاکستان میں متاثرہ افراد کی نشان دہی کے لیے ٹیسٹ 80 لاکھ سے متجاوز
پاکستان میں کرونا وائرس سے متاثرہ افراد کی نشان دہی کے لیے کیے جانے والے ٹیسٹس کی مجموعی تعداد 80 لاکھ سے زائد ہو چکی ہے۔.
سرکاری اعداد و شمار کے مطابق پاکستان میں گزشتہ 24 گھنٹوں میں 38 ہزار 813 ٹیسٹ کیے گئے جس کے بعد ٹیسٹس کی مجموعی تعداد 80 لاکھ 5 ہزار 794 ہو گئی ہے۔
حکومت کے مطابق پاکستان میں گزشتہ 24 گھنٹوں میں ٹیسٹ مثبت آنے کی شرح 3.1 فی صد رہی۔