پاکستان میں نو ماہ بعد ریکارڈ کیسز
پاکستان میں گزشتہ چوبیس گھنٹوں کے دوران کرونا وائرس کے تین ہزار 946 کیسز رپورٹ ہوئے ہیں۔ جو لگ بھگ نو ماہ کے عرصے میں کسی بھی ایک دن کے ریکارڈ کیسز ہیں۔
سرکاری اعداد و شمار کے مطابق ملک میں گزشتہ 24 گھنٹوں میں کرونا وائرس کی تشخیص کے لیے 38 ہزار 858 ٹیسٹ کیے گئے جن میں سے مثبت کیسز کی شرح دس فی صد سے زائد رہی۔
پاکستان میں جمعرات کو سامنے آنے والے کیسز دو جولائی کے بعد یومیہ کیسز کی سب سے زیادہ تعداد ہے۔
گزشتہ 24 گھنٹوں میں کرونا کے شکار 63 مریض بھی ہلاک ہوئے ہیں جس کے بعد ہلاکتوں کی کل تعداد 14 ہزار 28 ہو گئی ہے۔
عالمی سطح پر کرونا کیسز میں مسلسل چوتھے ہفتے اضافہ
عالمی سطح پر کووڈ 19 سے متاثرہ افراد میں چار ہفتوں کے دوران مسلسل اضافہ ریکارڈ کیا گیا ہے۔ گزشتہ ایک ہفتے میں نئے متاثرہ افراد کی تعداد 33 لاکھ تک جا پہنچی ہے.
کرونا وائرس سے اموات کی تعداد مسلسل چھ ہفتوں تک کم ہونے کے بعد 60 ہزار اضافی اموات رپورٹ کی گئی ہیں۔
عالمی ادارۂ صحت کے اعداد و شمار کے مطابق عالمی سطح پر کرونا سے ہر دس میں سے آٹھ اموات یورپ اور امریکہ میں واقع ہوئیں۔ سوائے مغربی بحرالکاہل خطے کے، دنیا کے تمام خطوں میں مرض کی شرح میں اضافہ دیکھنے میں آیا ہے۔
رپورٹ کے مطابق حالیہ ہفتوں میں عمومی طور پر براعظم افریقہ اور امریکہ کے ممالک میں کووڈ 19 سے متاثرہ افراد کی شرح ایک سطح پر برقرار رہی۔ البتہ برازیل سمیت کچھ ممالک میں کیسز کی تعداد میں اضافہ ہوا۔ برازیل میں کیسز کی شرح میں تین فی صد اضافہ ریکارڈ کیا گیا ہے۔
برازیل میں اموات کی تعداد 3 لاکھ سے تجاوز
برازیل میں کرونا وائرس سے ہلاکتوں کی تعداد تین لاکھ سے تجاوز کر گئی ہے جس کے بعد برازیل امریکہ کے بعد دوسرا ملک ہے جہاں اموات کی تعداد سب سے زیادہ ہے۔
برازیل میں پائی جانے والی کرونا وائرس کی مقامی قسم کو خطرناک قرار دیا جا رہا ہے اور حالیہ ہفتوں کے دوران کرونا سے اموات کی شرح میں بھی اضافہ ریکارڈ کیا گیا ہے۔
گزشتہ چند ہفتوں کے دوران برازیل میں یومیہ ہلاکتوں کی اوسطاً تعداد 2200 سے زیادہ ہے اور اب تک تین لاکھ 385 افراد ہلاک ہو چکے ہیں۔
سری لنکا اسپوتنک فائیو کی 70 لاکھ خوراکیں خریدے گا
سری لنکا نے روس کی تیار کردہ کرونا ویکسین اسپوتنک فائیو کی 70 لاکھ خوراکیں خریدنے کا فیصلہ کیا ہے۔
سری لنکن حکومت کا کہنا ہے کہ مذکورہ ویکسین کی خریداری کے لیے لگ بھگ 70 لاکھ ڈالر کی ادائیگی کی جائے گی۔
سری لنکا کی کل آبادی دو کروڑ بیس لاکھ افراد پر مشتمل ہے اور حکومت کا ایک کروڑ 40 لاکھ لوگوں کو ویکسین لگانے کا منصوبہ ہے۔
سری لنکا میں آٹھ لاکھ 50 ہزار سے زیادہ افراد برطانوی دوا ساز کمپنی ایسٹرازینیکا کی تیار کردہ ویکسین کی پہلی خوراک لے چکے ہیں۔
سری لنکا نے چین کی ویکسین سائنوفام کی منظوری بھی دے رکھی ہے۔
سری لنکا نے بھارت سے بطور عطیہ ویکسین کی پانچ لاکھ خوراکیں وصول کی ہیں اور مزید پانچ لاکھ وہ عنقریب خریدے گا جب کہ اقوامِ متحدہ کے ویکسین کی منصفانہ تقسیم کے پروگرام 'کوویکس' کے تحت سری لنکا دو لاکھ 64 ہزار خوراکیں وصول کر چکا ہے۔
یاد رہے کہ سری لنکا میں کرونا وائرس کے اب تک 91 ہزار سے زیادہ کیسز اور 554 اموات رپورٹ ہوئی ہیں۔