اگلے چند ہفتے تشویش ناک ہیں: اسد عمر
وفاقی وزیر منصوبہ بندی اسد عمر نے کہا ہے کہ اگلے چند ہفتے تشویش ناک ہیں۔
اسد عمر کا اپنے ایک ٹوئٹ میں کہنا ہے کہ چیلنج ابھی ختم نہیں ہوا ہے بلکہ اس میں اضافہ جاری ہے۔
انہوں نے کہا کہ اس وقت احتیاطی تدابیر اور کرونا ایس او پیز پر عمل درآمد کرنے کی سب سے زیادہ ضرورت ہے۔
ان کے بقول اگر ہم وبا کو تیزی سے پھیلنے دیں گے تو کوئی بھی نظام اس کے پھیلاؤ کا مقابلہ نہیں کر سکتا۔
ممبئی میں ویکسین کی قلت، تین روز کے لیے سینٹرز بند
بھارت میں مسلسل نویں روز کرونا کے ریکارڈ کیسز سامنے آنے کے بعد ممبئی میں ویکسین کی قلت کے باعث سینٹرز تین روز کے لیے بند کر دیے گئے ہیں۔
حکام کے مطابق ویکسین کی قلت کے سبب ممبئی میں جمعے سے تین روز کے لیے تمام تر ویکسی نیشن سینٹرز بند کر دیے گئے ہیں۔
وزارت صحت کے مطابق بھارت میں 16 جنوری 2021 سے لے کر 30 اپریل تک کرونا ویکسین کی 15.34 کروڑ خوراکیں فراہم کی جا چکی ہیں۔
امریکی امداد کی پہلی کھیپ بھارت پہنچ گئی
بھارت: گجرات کے کرونا اسپتال میں آتشزدگی سے 18 افراد ہلاک
بھارت کی مغربی ریاست گجرات میں کرونا کے مریضوں کے لیے مختص اسپتال میں جمعے کی رات آگ لگ گئی جس کی وجہ سے کرونا کے 16 مریض اور دو طبی عملے کے افراد ہلاک ہو گئے۔
رپورٹس کے مطابق پٹیل ویلفیئر اسپتال کے انتہائی نگہداشت وارڈ میں آدھی رات کے قریب آگ لگی۔
پولیس حکام کا کہنا تھا کہ ابتدائی تحقیقات کے مطابق آگ شارٹ سرکٹ کے باعث لگی۔
مقامی ذرائع ابلاغ میں نشر کی جانے والی ویڈیوز میں اسپتال کا وارڈ آگ کے سبب مکمل طور پر تباہ دیکھا جا سکتا ہے۔
وزیرِ اعظم نریندر مودی کا ٹوئٹ میں کہنا تھا کہ انہیں آگ کے سبب ہونے والی اموات پر دکھ ہے۔
خیال رہے کہ رواں سال 23 اپریل کو ممبئی کے مضافات میں قائم ایک اسپتال میں لگنے والی آگ سے 12 افراد ہلاک ہوئے تھے۔