پاکستان میں مزید 48 اموات، ڈھائی ہزار سے زائد نئے مریض رپورٹ
پاکستان میں کرونا وائرس کی تیسری لہر کے دوران مزید 48 افراد جان کی بازی ہار گئے ہیں۔
سرکاری اعداد و شمار کے مطابق جمعرات کو ملک میں دو ہزار 517 افراد میں وائرس کی تشخیص ہوئی ہے۔
حکام کے مطابق گزشتہ 24 گھنٹوں میں 30 ہزار 700 افراد کے کرونا ٹیسٹ کیے گئے جس میں مثبت کیسز کی شرح آٹھ اعشاریہ ایک نو فی صد رہی۔
پاکستان: آکسیجن سیلنڈرز پر خصوصی ٹیکس مراعات کا اعلان
وفاقی وزیر برائے سائنس اینڈ ٹیکنالوجی فواد چوہدری کا کہنا ہے کہ کرونا کی موجودہ صورتِ حال میں آکسیجن کی ضرورت کے پیشِ نظر کابینہ نے خصوصی فیصلے کے تحت آکسیجن سیلنڈرز اور اس سے جڑی تمام مصنوعات پر 180 دن کی خصوصی ٹیکس مراعات کا فیصلہ کیا ہے۔
فواد چوہدری نے ٹوئٹر پر جاری بیان میں مزید کہا کہ یہ فیصلہ فوری طور پر نافذالعمل ہو گا۔
ان کا کہنا تھا کہ گزشتہ ایک سال میں پاکستان نے آکسیجن کی پیداوار میں دگنا اضافہ کیا ہے۔
آسٹریلیا: بھارت میں پھنسے آسٹریلوی شہریوں کی وطن واپسی
آسٹریلیا، کرونا وبا سے شدید متاثرہ ملک بھارت میں پھنسے اپنے شہریوں کو خصوصی پرواز کے ذریعے وطن واپس لائے گا۔
آسٹریلوی حکومت کے مطابق 80 مسافر بھارتی دارالحکومت نئی دہلی سے ہفتے کو آسٹریلوی شہر ڈارون پہنچیں گے۔
واضح رہے کہ بھارت میں کرونا وبا کی شدت کے باعث آسٹریلوی حکومت کی طرف سے بھارت سے آنے والی پروازوں پر پچھلے ماہ پابندی لگا دی گئی تھی۔
آسٹریلیا پہنچنے والے مسافروں کو پرواز پر سوار ہونے سے پہلے کرونا ٹیسٹ کی دو منفی رپورٹس دکھانا ہوں گی۔ جس کے بعد آسٹریلیا پہنچنے پر انہیں دو ہفتوں کے لیے قرنطینہ میں رہنا ہو گا۔
آسٹریلیا کے لیے پرواز پر جمعے کو سوار ہونے والے 70 مسافروں کو سفر کرنے سے روک دیا گیا کیونکہ ان میں یا ان کے قریبی عزیزوں میں کرونا وائرس کی تشخیص ہوئی تھی۔
خیال رہے کہ حکومت کے اس فیصلے کی وجہ سے اسے شدید تنقید کا سامنا کرنا پڑا تھا۔