بھارت میں 45 دن میں ہفتے کو کم ترین یومیہ کیسز رپورٹ
بھارت میں گزشتہ 24 گھنٹوں کے دوران مزید ایک لاکھ 73 ہزار 790 افراد میں کرونا وائرس کی تشخیص ہوئی ہے۔ جو کہ گزشتہ 45 دنوں کے دوران رپورٹ کیے جانے والے یومیہ کیسز میں سب سے کم تعداد ہے۔
وزارتِ صحت کے سرکاری اعداد و شمار کے مطابق ہفتے کو وبا کے سبب مزید تین ہزار 617 افراد ہلاک ہوئے جس کے بعد وبا سے ہونے والی ہلاکتوں کی تعداد تین لاکھ 22 ہزار سے تجاوز کر گئی ہے۔
خیال رہے کہ بھارت میں اب تک دو کروڑ 77 لاکھ افراد میں وبا کی تشخیص ہو چکی ہے۔
ویت نام میں بھارتی اور برطانوی ویرینٹس کے مجموعے کی تشخیص
ویت نام کے حکام نے کرونا وائرس کے ایک ایسے ویرینٹ (قسم) کی تشخیص کی ہے جو کہ بھارتی اور برطانوی ویرینٹ کا مجموعہ قرار دیا جا رہا ہے اور ہوا کے ذریعے زیادہ تیزی سے پھیلتا ہے۔
وزیرِ صحت نگیون تھان لانگ کا ایک بیان میں کہنا ہے کہ نیا ویرینٹ بہت زیادہ خطرناک ہے۔
مقامی میڈیا کے مطابق وزیرِ صحت سامنے آنے والے نئے ویرینٹ کا نام اور تفصیلات جلد فراہم کریں گے۔
ویت نام میں رواں سال کرونا کیسز میں اضافہ دیکھا جا رہا ہے اور اب تک چھ ہزار 713 کیسز رپورٹ جب کہ 47 اموات ہو چکی ہیں۔
عالمی ادارہٴ صحت نے کرونا وائرس کے چار ویرینٹس کی تشخیص کی ہے جن میں برطانوی، برازیلی، جنوب افریقی اور بھارتی اقسام شامل ہیں۔
بھارت میں بلیک فنگس سے 300 افراد ہلاک، 12 ہزار متاثر
بھارت میں بلیک فنگس کے سبب 300 سے زائد افراد ہلاک ہو چکے ہیں۔ رپورٹس کے مطابق اب تک 12 ہزار سے زائد افراد بلیک فنگس سے متاثر ہوئے ہیں۔
دارالحکومت نئی دہلی کے ایک سرجن کے مطابق بلیک فنگس سے وہ افراد متاثر ہو سکتے ہیں جنہیں کرونا سے متاثر ہونے پر آکسیجن لگائی گئی ہو۔
مہلک فنگس جسم میں تیزی سے پھیلتا ہے اور ناک، آنکھوں، جبڑے اور دماغ پر حملہ کرتا ہے جس کے سبب سرجری کرنا پڑتی ہے اور متاثرہ مریض معذور ہو جاتا ہے۔
بلیک فنگس کا علاج ‘ایمفوٹیرسین بی’ نامی انجیکشن سے کیا جا سکتا ہے تاہم کیسز میں اضافے کے سبب بھارت میں اس انجیکشن کی شدید قلت ہے۔
ماہرین کا کہنا ہے کہ کرونا کے مریضوں کو خاصی تعداد میں اسٹرائیڈ دینے کی وجہ سے قوت مدافعت کم ہو جاتی ہے جس کی وجہ سے بلیک فنگس کا خطرہ بڑھ جاتا ہے۔
پاکستان کو 'سائنوویک' ویکسین کی مزید پانچ لاکھ خوراکیں موصول
پاکستان میں کرونا سے بچاؤ کی ویکسی نیشن مہم جاری ہے جب کہ اتوار کو چین کی 'سائنوویک' ویکسین کی مزید پانچ لاکھ خوراکیں پاکستان پہنچ گئی ہیں۔
پاکستان کی قومی ایئر لائن 'پی آئی اے' کا طیارہ ویکسین کی خوراکیں لے کر اسلام آباد پہنچا۔
گزشتہ ہفتے بھی پی آئی اے کے ذریعے سائنوویک' ویکسین کی 20 لاکھ خوراکیں پاکستان پہنچائی گئی تھیں۔
حکام کے مطابق پاکستان کو اب تک مجموعی طور پر کرونا ویکسین کی ایک کروڑ 30 لاکھ خوراکیں موصول ہو چکی ہیں۔