بھارت میں کرونا کیسز میں بدستور کمی
بھارت میں کرونا وائرس کے کیسز کی یومیہ تعداد میں بدستور کمی واقع ہو رہی ہے۔ تاہم، اموات کی یومیہ تعداد اب تک 3000 سے زیادہ ہے۔
سرکاری اعداد و شمار کے مطابق، گزشتہ 24 گھنٹوں کے دوران ایک لاکھ 32 ہزار 788 افراد میں وائرس کی تشخیص ہوئی ہے جب کہ وبا کے شکار مزید 3207 مریض دم توڑ گئے ہیں۔
وزارتِ صحت کے مطابق، بھارت میں اب تک دو کروڑ 80 لاکھ سے زیادہ کیسز رپورٹ ہو چکے ہیں اور وبا سے اب تک تین لاکھ 35 ہزار 102 ہلاکتیں ہو چکی ہیں۔
اس برس امتحانات ضرور ہوں گے، وزیرِ تعلیم شفقت محمود
پاکستان کے وزیرِ تعلیم شفقت محمود نے کہا ہے کہ رواں برس ہر صورت امتحانات لیے جائیں گے کیوں کہ امتحانات کے بغیر اگلی کلاسز میں پروموٹ کرنا طلبہ کے لیے فائدہ مند نہیں ہے۔
بدھ کو بین الصوبائی وزرائے تعلیم کے اجلاس کے بعد خطاب کرتے ہوئے شفقت محمود کا کہنا تھا کہ میٹرک اور انٹرمیڈیٹ کے امتحانات جولائی میں لیے جائیں گے جب کہ ستمبر میں رزلٹ جاری کر دیا جائے گا۔
شفقت محمود کا کہنا تھا کہ نویں اور دسویں جماعت کے لیے ریاضی اور اختیاری مضامین کے امتحانات لیے جائیں گے۔
اُن کا کہنا تھا کہ دسویں اور بارہویں کے امتحانات پہلے جب کہ نویں اور گیارہویں کے امتحانات بعد میں لیے جائیں گے۔
وزیرِ تعلیم کا کہنا تھا کہ او لیولز کے بچوں کے لیے خصوصی امتحانات 26 جولائی سے شروع ہوں گے۔
علما ویکسین کی افادیت سے عوام کو آگاہ کریں، صدر عارف علوی
پاکستان کے صدر ڈاکٹر عارف علوی نے کہا ہے کہ علما کرام نے کرونا ویکسین کے اجزائے ترکیبی پر اطمینان کا اظہار کیا ہے اور وہ لوگوں کو اس کے محفوظ ہونے سے متعلق آگاہی بھی دیں گے۔
بدھ کو ملک بھر سے بذریعہ ویڈیو لنک علما اور مشائخ کے اجلاس سے خطاب کرتے ہوئے ڈاکٹر عارف علوی نے کہا کہ ویکسین لگوانے پر عوام الناس کو ترغیب دلانے کے لیے علما و مشائخ مساجد، امام بارگاہوں، خانقاہوں اور مدارس سے مؤثر اور مثبت آواز بلند کریں گے۔
اُن کا کہنا تھا کہ اس ضمن میں آئندہ جمعے یعنی چار جون کو علما کرام مساجد عوام کو ویکسین لگوانے کی خصوصی تلقین کریں گے جب کہ یہ سلسلہ آئندہ بھی جاری رکھا جائے گا۔
بائیڈن کا امریکیوں کو ویکسین لگوانے کے لیے ہنگامی مہم کا اعلان
امریکہ کے صدر جو بائیڈن نے کرونا ویکسین لگوانے والوں اور نہ لگوانے والوں کی تفریق پر تشویش کا اظہار کرتے ہوئے کہا ہے کہ "میں نہیں چاہتا کہ امریکہ جو پہلے ہی تقسیم کا شکار ہے، ایک اور قسم کی تقسیم کا شکار ہو جائے"۔ انہوں نے بدھ کو یہ بات کرونا وائرس کی ویکسین سے متعلق نئے اقدامات کا اعلان کرتے ہوئے کہی۔
وائس آف امریکہ کے اسٹیو ہرمن کی رپورٹ کے مطابق، انہوں نے اس تقسیم کی نشاندہی کرتے ہوئے کہا کہ "وہ جگہیں، جہاں لوگ کووڈ کے خوف سے آزاد ہو کر زندگی گزار رہے ہوں، اور وہ جگہیں، جہاں موسم خزاں شروع ہوتے ہی موت اور سنگین مرض واپس آجائے"۔
بائیڈن نے یہ واضح کرتے ہوئے کہ ویکسین کی تیاری امریکہ کی دونوں جماعتوں کے دور حکومت میں ہوئی، یہ بھی کہا کہ "ویکسین لگوانا کوئی جانبدارانہ عمل نہیں ہے۔ ہمیں ایک امریکہ کے طور پر متحد ہونا چاہئے، جہاں کوئی خوف نہ ہو"۔
اس سے قبل بدھ کی صبح وائٹ ہاؤس کی ترجمان جین ساکی نے ایک پریس بریفنگ میں بتایا کہ امریکہ کی 63 فی صد آبادی نے کرونا وائرس سے بچاؤ کی ویکسین لگوا لی ہے، جب کہ امریکہ میں انتظامیہ کی بھرپور ویکسین مہم کی وجہ سے 40 سال سے زائد عمر کے 72 فی صد افراد کو کرونا ویکسین لگانے کا عمل مکمل ہو گیا ہے۔