پنجاب میں تمام تعلیمی ادارے کھل گئے
پاکستان کے صوبہ پنجاب میں کرونا وبا کے پیشِ نظر بند کیے گئے اسکول سات جون سے کھول دیے گئے ہیں۔
صوبے میں پیر سے پہلی سے دسویں جماعت تک کے طلبا کی تعلیمی سرگرمیوں کا باقاعدہ آغاز ہو گیا ہے۔
اس سلسلے میں پہلی سے دسویں جماعت تک کے طلبا ایس او پیز کا خیال رکھتے ہوئے ماسک پہن کر اسکول آئے۔
دوسری جانب طلبا کی آمد کے موقع پر اسکول انتظامیہ کی جانب سے درجہ حرارت بھی چیک کیا گیا۔
بھارت میں کرونا کیسز میں بتدریج کمی
بھارت میں گزشتہ 24 گھنٹوں کے دوران کرونا کے ایک لاکھ 636 نئے کیسز رپورٹ ہوئے ہیں۔
وزارت صحت کے مطابق ملک میں پیر کو مزید دو ہزار 427 افراد ہلاک ہوئے ہیں۔
بھارت میں گزشتہ 24 گھنٹوں کے دوران کرونا کے ایک لاکھ 74 ہزار مریض صحت یاب ہوئے ہیں۔
پاکستان میں کرونا کے 1490 نئے کیسز رپورٹ
پاکستان میں گزشتہ 24 گھنٹوں کے دوران کرونا کے مزید 1490 کیس رپورٹ ہوئے ہیں جس کے بعد مثبت کیسز کی شرح تین اعشاریہ صفر ایک فی صد رہ گئی ہے۔
سرکاری اعداد و شمار کے مطابق ملک میں کرونا سے مزید 58 افراد ہلاک ہو گئے ہیں جس کے بعد ہلاکتوں کی کُل تعداد 21 ہزار 323 ہو گئی ہے۔
پاکستان میں مجموعی طور پر اب تک کرونا کے نو لاکھ 33 ہزار 630 مصدقہ کیس رپورٹ ہو چکے ہیں۔
پابندیوں میں نرمی، بالی وڈ فلموں کی شوٹنگ کا دوبارہ آغاز
عالمی وبا کرونا وائرس سے سب سے زیادہ متاثر ہونے والے ممالک میں سے ایک بھارت میں کرونا کے یومیہ کیسز میں بتدریج کمی دیکھنے میں آ رہی ہے جس کے بعد اب متعدد ریاستوں میں نافذ پابندیوں میں نرمی کا سلسلہ جاری ہے۔
لاک ڈاؤن کی وجہ سے ملک بھر میں جہاں دیگر سرگرمیاں متاثر ہوئی وہیں انٹرٹینمنٹ انڈسٹری کو بھی شدید نقصان پہنچا ہے۔
بھارت میں کرونا کے بڑھتے ہوئے کیسز کے پیشِ نظر بالی وڈ کی متعدد فلموں کی شوٹنگ روک دی گئی تھی جن میں اداکار اکشے کمار کی فلم 'رام سیتو'، اداکارہ عالیہ بھٹ کی فلم 'گنگو بائی کاٹھیاواڑی'، اداکار کارتک آریان کی فلم 'بھول بھلیاں ٹو' سمیت دیگر فلمیں شامل ہیں۔
اب کئی ہفتوں بعد بھارت کے دارالحکومت دہلی، فلمی دنیا کے مرکز ممبئیاور تامل ناڈو سمیت دیگر ریاستوں میں سات جون سے لاک ڈاؤن کے تحت نافذ پابندیوں میں نرمی کی گئی ہے۔
بھارت کی ریاست مہاراشٹرا کے وزیر اعلیٰ ادھو ٹھاکرے نے اتوار کو ممبئی میں فلم اور ٹی وی کے لیے شوٹنگ کی اجازت دی تھی۔
ادھو ٹھاکرے کا کہنا تھا کہ فلم اور ٹی وی کی شوٹنگ کے لیے پروڈیوسرز کو کرونا کی ایس او پیز پر عمل کرنے کو یقینی بنانا ہو گا۔