آسٹریلیا: ڈیلٹا ویرینٹ کے پھیلاؤ کے سبب ایمرجنسی میٹنگ طلب
آسٹریلیا میں کرونا وائرس کی انتہائی مہلک قسم ڈیلٹا ویرینٹ کے پھیلاؤ کے پیش نظر کرونا وبا سے نمٹنے والی کمیٹی کی پیر کو ایمر جنسی میٹنگ طلب کر لی گئی ہے۔
وزیر خزانہ جوشفرائڈنبرگ کا 'آسٹریلین براڈ کاسٹنگ کارپوریشن' کو دیے جانے والے انٹرویو میں کہنا تھا کہ وہ سمجھتے ہیں کہ آسٹریلیا مزید مہلک ڈیلٹا ویرینٹ کے ساتھ وبا کے ایک نئے دور میں داخل ہو رہا ہے۔
آسٹریلیا میں لگ بھگ ایک کروڑ 80 لاکھ آسٹریلوی یا آبادی کا 70 فی صد حصے کو وبا کے سبب لگائے گئے لاک ڈاؤن یا پابندیوں کا سامنا ہے اور لگ بھگ تمام ریاستیں اور علاقے کرونا وبا کی لپیٹ میں ہیں۔
خیال رہے کہ آسٹریلیا کے گنجان ترین شہر سڈنی میں ہفتے کے اختتام پر دو ہفتوں کا لاک ڈاؤن نافذ کر دیا گیا تھا۔ جب کہ شمالی شہر ڈارون وبا کی وجہ سے دو دنوں کے لیے بند ہے۔
جنوبی افریقہ: کرونا کیسز میں اضافے کے باعث عائد کردہ پابندیوں میں سختی کر دی گئی
جنوبی افریقہ میں کرونا وائرس کے پھیلاؤ کو روکنے کے لیے عائد کردہ پابندیوں میں 14 روز کے لیے سختی کر دی گئی ہے۔
صدر سیرل راما فوسا کا ٹی وی خطاب میں کہنا تھا کہ اضافی پابندیاں ضروری ہیں اور وہ چاہتے ہیں کہ سماجی رابطوں کو محدود کیا جائے اور معیشت کو بھی بحال رکھ سکیں۔
جنوبی افریقہ، براعظم افریقہ میں کرونا کیسز اور اموات کے حساب سے سب سے زیادہ متاثرہ ملک ہے۔ جسے اس وقت کرونا وبا کی تیسری لہر کا سامنا ہے۔
مقامی سائنس دانوں کا کہنا ہے کہ کرونا وائرس کا ڈیلٹا ویرینٹ جس کی سب سے پہلے بھارت میں تشخیص کی گئی تھی، وہ تیزی سے پھیل رہا ہے۔
جنوبی افریقہ میں ہفتے کو لگ بھگ 18 ہزار نئے کیسز رپورٹ کیے گئے۔ جو کہ رواں سال جنوری میں رپورٹ کیے جانے والے ریکارڈ یومیہ کیسز کے قریب ہیں۔
اعلان کردہ پابندیوں میں اجتماعات پر پابندی کے علاوہ رات نو بجے سے صبح چار بجے تک کرفیو لگایا جائے گا۔ جب کہ الکوحل کی فروخت پر بھی پابندی ہو گی۔
جاپان: ڈیلٹا ویرینٹ سے متاثرہ ممالک سے آنے والے ایتھلیٹس کو روزانہ ٹیسٹس کرانے کی ہدایت
جاپان، بھارت اور پاکستان سمیت دیگر چار ممالک جو کرونا وائرس کے ڈیلٹا ویرینٹ سے شدید متاثر ہیں، کے ایتھلیٹس سے کہے گا کہ وہ ٹوکیو اولمپکس کے لیے آنے سے پہلے سات دنوں تک روزانہ کرونا ٹیسٹ کرائیں۔
جاپان کی حکومت کا کہنا ہے کہ وہ بھارت، مالدیپ، نیپال، پاکستان، سری لنکا اور افغانستان سے آنے والے ایتھلیٹس پر یکم جولائی سے اس پابندی کا اطلاق کرے گا۔
اس وقت تمام بین الاقوامی کھلاڑیوں کو کہا گیا ہے کہ وہ اولمپکس میں آنے سے چار دن پہلے دو بار کرونا ٹیسٹس کرائیں۔
خیال رہے کہ ٹوکیو اولمپکس، کرونا وبا کے سبب ایک سال کی تاخیر کے بعد اگلے ماہ 23 جولائی سے شروع ہو رہی ہیں۔
وزیر اولمپکس کا جمعے کو کہنا تھا کہ یوگنڈا کی ٹیم کے ایک ایتھلیٹ میں جاپان پہنچنے پر ڈیلٹا ویرینٹ کی تشخیص ہوئی ہے۔ جس کے باعث خدشات پیدا ہو گئے ہیں کہ اولمپکس کے آغاز سے وبا کی نئی لہر شروع ہو سکتی ہے۔
پاکستان میں مزید 914 نئے کیسز رپورٹ
پاکستان میں گزشتہ 24 گھنٹوں کے دوران 44 ہزار 496 افراد کے کرونا ٹیسٹ کیے گئے۔ جن میں سے 914 افراد میں وائرس کی تشخیص ہوئی ہے۔
سرکاری اعداد و شمار کے مطابق ملک میں کرونا سے مزید 20 افراد جان کی بازی ہار گئے ہیں۔
پاکستان میں مثبت کیسز کی شرح دو اعشاریہ صفر پانچ فی صد ریکارڈ کی گئی ہے۔
پاکستان میں گزشتہ 24 گھنٹوں کے دوران 910 افرد صحت یاب ہوئے ہیں۔ جس کے بعد کرونا سے صحت یاب ہونے والے افراد کی مجموعی تعداد نو لاکھ 1201 ہو گئی ہے۔