انڈونیشیا میں آکسیجن کی کمی، دیگر ممالک سے درآمد کی کوشش
انڈونیشیا کو کرونا وائرس کی بدترین لہر کے سبب ہنگامی امداد میں لگائی جانے والی آکسیجن کی کمی کا سامنا ہے۔
حکام کے مطابق وبا سے متاثرہ افراد کے لیے آکسیجن سنگاپور سے درآمد کی جا رہی ہے۔
انڈونیشیا میں حکام نے چین سمیت دیگر پڑوسی ممالک سے بھی مدد کی اپیل کی ہے۔
انڈونیشیا میں 24 گھنٹوں میں لگ بھگ 30 ہزار کے قریب افراد کرونا وائرس سے متاثر ہوئے ہیں جب کہ حکام نے مزید 558 اموات کی تصدیق کی ہے۔
ملک بھر میں اب تک 23 لاکھ افراد وبا سے متاثر ہو چکے ہیں جب کہ 61 ہزار سے زائد اموات ہوئی ہیں۔
اولمپکس میراتھن میں شائقین کے راستوں سے دور رہنے پر زور
جاپان میں اولمپکس کے انتظامات کرنے والے حکام کا کہنا ہے کہ کرونا وائرس کا پھیلاؤ روکنے کے لیے اولمپکس کے میراتھن میں شائقین کو راستے دور رکھنے پر زور دیا جائے گا۔
منگل کو انتظامی عملے کا کہنا تھا کہ کرونا کی حالیہ صورتِ حال کو دیکھتے ہوئے یہ ضروری ہے کہ وبا کے پھیلاؤ کے خطرے کو کم سے کم کیا جائے۔ اس کے لیے لوگوں کو قریب آنے سے روکنا ہوگا۔
ایک بیان میں حکام کا کہنا تھا کہ وبا کے خطرے کے باعث شائقین کو کہا جائے گا کہ وہ دوڑ کے راستے میں کھڑے نہ ہوں۔
واضح رہے کہ اولمپکس گزشتہ برس جاپان میں ہونے تھے البتہ ان کو رواں برس کے لیے مؤخر کیا گیا تھا اور ان یہ رواں ماہ سے ہونے والے ہیں جب کہ اس کا آخری ایونٹ میراتھن ریس ہوگا جو کہ آئندہ ماہ میں 7 اور 8 اگست کو منقعد ہوگا۔
'ڈیلٹا' قسم کے پھیلاؤ کے باوجود برطانیہ کا کرونا پابندیاں ختم کرنے کا عندیہ
برطانیہ کے وزیرِاعظم بورس جانسن نے کہا ہے کہ حکومت ملک میں کرونا وائرس کی تیزی سے پھیلنے والی 'ڈیلٹا' قسم کے کیسز میں اضافے کے باوجود 19 جولائی کو لاک ڈاؤن ختم کرنے کا ارادہ رکھتی ہے۔ تاہم ان کے بقول اس سے متعلق حتمی فیصلہ آئندہ ہفتے کیا جائے گا۔
برطانوی وزیرِاعظم نے کہا کہ سماجی فاصلہ برقرار رکھنے کی شرط بھی ختم ہو جائے گی۔ تاہم کاروبار چاہیں تو ماسک کی پابندی برقرار رکھ سکتے ہیں۔
پیر کو لندن میں نیوز کانفرنس کرتے ہوئے ان کا کہنا تھا کہ 'ہم پابندیوں کو ہٹا دیں گے اور لوگوں کو اجازت دیں گے کہ وہ معلومات کی بنیاد پر وائرس سے بچاؤ کے لیے اقدامات سے متعلق خود فیصلہ کریں۔'
وزیرِاعظم نے کہا کہ جب حکومت پابندیاں ہٹا دے گی تو ممکن ہے کہ ملک میں انفیکشن اور اموات کی تعداد میں اضافہ ہو۔
خبر رساں اداروں کے مطابق کرونا وائرس کی قسم 'ڈیلٹا' کے کیسز دنیا بھر بشمول جنوبی کوریا میں بھی سامنے آئے ہیں۔
کرونا وبا کے سائے تلے ستارے 'کان فلم فیسٹیول' میں جلوے بکھیرنے کے لیے تیار
کرونا وائرس کے سائے تلے فرانس کے ساحلی شہر کان میں فلمی دنیا کے سب سے بڑے میلے 'کان فلم فیسٹیول' کا آغاز آج بروز منگل سے ہو گا۔
فرانس میں کرونا کے ڈیلٹا ویرینٹ کے پھیلاؤ کے خوف سے 'کان فلم فیسٹیول' کے منتظمین اور حکام ایونٹ کو کامیاب بنانے کے لیے کرونا ایس او پیز پر سختی سے عمل درآمد کر رہے ہیں۔
کان فلم فیسٹیول کا یہ 74 واں رنگا رنگ ایونٹ چھ سے 17 جولائی تک جاری رہے گا۔بارہ روزہ فیسٹیول میں فلموں کی نمائش، پریس کانفرنسز اور لیٹ نائٹ پارٹیز ہوں گی اور ستارے ریڈ کارپٹ پر جلوے بکھیریں گے۔
کان فلم فیسٹیول کا انعقاد عموماً مئی میں ہوتا ہے لیکن رواں سال یہ جولائی میں ہو رہا ہے۔ گزشتہ برس کرونا وبا کے باعث اس ایونٹ کو منسوخ کر دیا گیا تھا۔
خبر رساں ادارے 'ایسوسی ایٹڈ پریس' کے مطابق منگل کو کان فلم فیسٹیول کا آغاز فرانسیسی ہدایت کار لیوز کاریکس کی میوزیکل فلم 'انیٹ' سے ہو گا۔ فیسٹیول میں 24 فلموں کے درمیان مقابلہ ہے۔
فیسٹیول میں حال ہی میں ریلیز ہونے والی ہالی وڈ فلم 'فاسٹ اینڈ فیورس 9'، ڈرامہ اور تھرل سے بھرپور فلم 'اسٹک واٹر' اور کامیڈی ڈرامہ فلم 'دی فرینچ ڈس پیچ' سمیت کئی فلمیں نمائش کے لیے پیش کی جائیں گی۔