کیا پاکستان کرونا وبا کی چوتھی لہر سے نمٹنے کے لیے تیار ہے؟
امریکہ کے تجزیہ کار کوگل مين نے جریدے ’اکانومسٹ‘ کی 'گلوبل نارمیلسی انڈیکس' پر تنقید کرتے ہوئے سوشل میڈیا پر ایک بیان میں کہا ہے کہ یہ درجہ بندی قبل از وقت ہے۔ جب کہ انہوں نے پاکستان کے لیے اسے اہم بھی قرار دیا۔ اس بارے میں جانتے ہیں وائس آف امریکہ کی مونا کاظم شاہ سے اسد اللہ خالد کی گفتگو میں۔
امریکہ کی انڈونیشیا کو ویکسین کی 30 لاکھ خوراکیں فراہم
انڈونیشیا میں کرونا کیسز میں مسلسل اضافے کے سبب امریکہ میں بائیڈن انتظامیہ نے جمعے کو موڈرنا ویکسین کی 30 لاکھ خوراکیں انڈونیشیا بھیج دی ہیں۔
وائٹ ہاؤس کی پریس سیکریٹری جین ساکی کا صحافیوں سے گفتگو میں کہنا تھا کہ ویکسین بھیجنے کے علاوہ امریکہ وبا کے خلاف اقدامات کرنے میں بھی انڈونیشیا کی معاونت کر رہا ہے۔
جین ساکی کا مزید کہنا تھا کہ انہیں اندازہ ہے کہ انڈونیشیا کو اس وقت وبا کے سبب مشکل حالات کا سامنا ہے اور ان کے جذبات وبا سے متاثرہ افراد کے ساتھ ہیں۔
انڈونیشیا میں اس وقت ریکارڈ کرونا کیسز سامنے آ رہے ہیں اور ڈیلٹا قسم کی وجہ سے اموات میں اضافہ ہو رہا ہے۔
بھارت میں ڈیلٹا کے بعد مزید مہلک قسم ’ڈیلٹا پلس‘ کی تشخیص
بھارت کی شمال مشرقی ریاست تری پورہ میں کرونا وائرس کی قسم ڈیلٹا پلس کے کم از کم 138 کیسز رپورٹ ہوئے ہیں جس کے بعد ریاستی حکومت کی طرف سے ہفتے کی دوپہر 12 بجے سے پیر کی صبح چھ بجے تک کرفیو نافذ کر دیا گیا ہے۔
بھارت کے اخبار 'ہندوستان ٹائمز' کے مطابق وزارتِ صحت کے حکام کا کہنا ہے کہ انہوں نے کرونا وائرس کے 151 نمونے تشخیص کے لیے لیبارٹری میں بھیجے جن میں سے 138 میں ڈیلٹا پلس ویرینٹ، 10 میں ڈیلٹا ویرینٹ جب کہ تین میں ایلفا ویرینٹ کی تشخیص ہوئی ہے۔
خیال رہے کہ ڈیلٹا پلس، ڈیلٹا کے مقابلے میں زیادہ مہلک ویرینٹ ہے جو کہ پھیپھڑوں کو متاثر کرتا ہے۔
علاوہ ازیں بھارتی ریاست اتر پردیش میں بھی گزشتہ دنوں ڈیلٹا پلس ویرینٹ کے کیسز رپورٹ کیے گئے تھے۔
بھارت کی کرکٹ ٹیم کا دورہٴ سری لنکا مؤخر
بھارت کے بورڈ آف کنٹرول فار کرکٹ (بی سی سی آئی) کا کہنا ہے کہ سری لنکن کرکٹ ٹیم کے دو افراد میں کرونا وبا کی تشخیص کے بعد بھارت کی کرکٹ ٹیم کا دورہٴ سری لنکا پانچ روز کے لیے مؤخر کر دیا گیا ہے۔
اس سے قبل سری لنکن کرکٹ بورڈ کا جمعے کو کہنا تھا کہ رواں ہفتے برطانیہ کے دورے سے واپس آنے والی ٹیم کے دو افراد بیٹنگ کوچ گرانٹ فلاور اور ڈیٹا اینالسٹ جی ٹی نیروشان کے کرونا ٹیسٹ مثبت آئے تھے۔
بی سی سی آئی کے سیکریٹری جے شاہ کا کہنا ہے کہ وہ سمجھتے ہیں کہ اس وقت حالات مختلف ہیں اور بی سی سی آئی اس موقع پر سری لنکن کرکٹ بورڈ کو اپنی مکمل حمایت پیش کرتا ہے۔ تاکہ دونوں ممالک کے درمیان سیریز باآسانی منعقد ہو سکے۔
ان کا کہنا تھا کہ بھارت کے ماہرین کی ٹیم سری لنکن کرکٹ بورڈ کے ساتھ مسلسل رابطے میں ہے۔ تا کہ تمام مطلوبہ اقدامات ہو سکیں۔
سری لنکن کرکٹ بورڈ کے چیف ایگزیکٹو ایشلے ڈی سلوا کا کہنا ہے کہ وہ بھارت کے بورڈ کی طرف سے صورتِ حال کو سمجھنے پر شکر گزار ہیں۔
اب بھارت اور سری لنکا کے درمیان تین ایک روزہ میچز رواں ماہ 18، 20 اور 23 جولائی کو کھیلے جائیں گے جس کے بعد تین ٹی ٹونٹی میچز کا انعقاد 25، 27 اور 29 جولائی کو ہو گا۔ یہ تمام میچز کولمبو میں کھیلے جائیں گے۔