بھارت میں 37 ہزار 154 نئے کیسز رپورٹ
بھارت کی وزارت صحت کی جانب سے جاری اعداد و شمار کے مطابق ملک میں پیر کو مزید 37 ہزار 154 نئے کیسز رپورٹ ہوئے ہیں۔
اعداد و شمار کے مطابق بھارت میں گزشتہ 24 گھنٹوں کے دوران کرونا سے 724 افراد جان کی بازی ہار گئے ہیں۔
ملک میں کرونا وائرس سے مزید 39 ہزار 649 افراد صحت یاب ہوئے ہیں۔
جان ہاپکنز کے اعداد و شمار کے مطابق بھارت میں کرونا وائرس سے اب تک تین کروڑ 87 لاکھ چار ہزار 376 افراد متاثر ہو چکے ہیں جب کہ وائرس سے ہونے والی مجموعی ہلاکتوں کی تعداد چار لاکھ 87 ہزار 64 ہے۔
پاکستان: مثبت کیسز کی شرح تین اعشاریہ آٹھ چار ریکارڈ
پاکستان میں گزشتہ چوبیس گھنٹوں کے دوران 47 ہزار 15 افراد کے ٹیسٹ کیے گئے ہیں جن میں سے ایک ہزار 808 افراد میں وائرس کی تشخیص ہوئی ہے۔
سرکاری اعداد و شمار کے مطابق ملک میں کرونا سے مزید 15 افراد کی ہلاکت ہوئی ہے جب کہ مثبت کیسز کی شرح تین اعشاریہ آٹھ چار ریکارڈ کی گئی ہے۔
پاکستان میں کرونا وائرس سے مزید 670 افراد صحت یاب بھی ہوئے ہیں۔
ملک میں کرونا سے اب تک نو لاکھ 75 ہزار 92 افراد متاثر ہوئے ہیں۔ وائرس سے ہونے والی ہلاکتوں کی مجموعی تعداد 22 ہزار 597 ہے۔
انڈونیشیا میں 40 ہزار سے زائد کیسز رپورٹ
انڈونیشیا میں کرونا وائرس کے کیسز سے تیزی سے اضافہ دیکھنے میں آ رہا ہے جہاں پیر کو 40 ہزار 427 نئے کیسز رپورٹ ہوئے ہیں۔
خبر رساں ادارے ’رائٹرز‘ کے مطابق انڈونیشیا میں گزشتہ چوبیس گھنٹوں کے دوران 891 افراد ہلاک ہوئے ہیں۔
انڈونیشیا میں کرونا سے اب تک 25 لاکھ سے زائد افراد متاثر ہو چکے ہیں جب کہ وائرس سے ہونے والی ہلاکتوں کی مجموعی تعداد 67 ہزار 355 ہے۔
بیک وقت کرونا کے دو ویرینٹس میں مبتلا خاتون کی ہلاکت، ماہرین کا ٹیسٹنگ میں اضافے کا مطالبہ
کرونا وائرس کے پھیلاؤ پر قابو پانے کے لیے جہاں دنیا بھر میں ویکسی نیشن کے عمل کو تیز کیا جا رہا ہے وہیں وائرس کے تیزی سے پھیلنے والے ویرینٹس نے صورتِ حال کو مزید پیچیدہ کر دیا ہے۔
خبر رساں ادارے 'رائٹرز' کے مطابق اتوار کو بیلجیم کے محققین نے انکشاف کیا ہے کہ مارچ میں بیلجیم سے تعلق رکھنے والی 90 سالہ خاتون بیک وقت کرونا کے 'ایلفا' اور 'بیٹا' ویرینٹ میں مبتلا ہونے کے بعد انتقال کر گئی تھیں۔
محققین کا کہنا ہے کہ خاتون کے بیک وقت کرونا کی دو اقسام میں مبتلا ہونے کے اس غیر معمولی کیس کو کم نہیں سمجھا جا سکتا۔
خبر رساں ادارے 'اے ایف پی' کے مطابق 90 سالہ خاتون نے کرونا کی ویکسین نہیں لگوائی تھی جب کہ مارچ میں انہیں بیلجیم کے شہر آلسٹ کے او ایل وی اسپتال میں داخل کرایا گیا تھا جہاں ان میں کرونا کی تشخیص ہوئی تھی۔
طبی عملے نے جب خاتون میں کرونا کی تیزی سے پھیلنے والی قسم کی موجودگی کا معائنہ کیا تو انہیں معلوم ہوا کہ ان میں کرونا کے دو ویرینٹس 'ایلفا' اور 'بیٹا' موجود تھے۔