بھارت میں کرونا سے زندگی ہارنے والوں کی یاد میں ٹیٹو بنوانے کا رجحان
بھارت کے دارالحکومت نئی دہلی کے ٹیٹو اسٹوڈیوز میں کرونا وبا کی دوسری لہر کے دوران اپنی جانیں گنوانے والے افراد کی یاد میں ٹیٹوز بنوانے والوں کی تعداد میں اضافہ دیکھنے میں آ رہا ہے۔بھارت میں لاکھوں افراد کرونا وائرس سے متاثر ہوئے ہیں جب کہ بڑی تعداد میں زندگی کی بازی ہار گئے ہیں۔ دیکھیے اس رپورٹ میں۔
ٹوکیو اولمپکس میں شریک 100 امریکی ایتھلیٹس نے ویکسین نہیں لگوائی
ٹو کیو اولمپکس کی افتتاحی تقریب سے کچھ گھنٹے قبل امریکی اولمپک اور پیرا اولمپک کمیٹی کے میڈیکل چیف نے بتایا کہ اولمپکس کے لئے ٹوکیو پہنچنے والے 613 امریکی کھلاڑیوں میں سے 100 نے کووڈ کی ویکسین نہیں لگوائی۔
امریکی اولمپک اور پیرا اولمپک کمیٹی کے میڈیکل ڈائریکٹر جوناتھن فینوف نے بتایا کہ امریکی ایتھلیٹس کی جانب سے سفر سے پہلے صحت سے متعلق پُر کئے جانے والے فارمز دیکھ کر پتا چلا کہ 83 فی صد امریکی ایتھلیٹس نے ویکسین لگوارکھی ہے۔
فینوف نے کہا، "83 فیصد ایک بڑی تعداد ہے اور ہم اس سے کافی خوش ہیں۔"
امریکہ میں امراض کی روک تھام کے ادارے سی ڈی سی کے مطابق، قومی سطح پر اب تک 56.3 فی صد امریکیوں کو ویکسین کی کم از کم ایک خوراک لگ چکی ہے۔
بین الاقوامی اولمپک کمیٹی (آئی او سی) کے اندازے کے مطابق، کھیلوں کے اولمپکس کے مقابلوں کے لئے تیار کئے گئے 'اولمپک ویلیج' میں رہنے والے تقریبا 85 فیصد افراد نے ویکسین لگوا رکھی ہے۔ یہ اعدادو شمار اولمپکس میں شرکت کرنے والے تمام ملکوں کی اولمپک کمیٹیوں کی جانب سے فراہم کی گئی معلومات کی بنیاد پر مرتب کئے گئے ہیں، تاہم ان کی غیر جانبدار ذرائع سے تصدیق نہیں کی گئی۔
ایسوسی ایٹڈ پریس کے مطابق، امریکی اولمپک اور پیرا اولمپک کمیٹی (یو ایس او پی سی) کی رپورٹ زیادہ ٹھوس ہے، کیونکہ یہ سوالناموں پر مبنی ہے، جن کے جواب امریکی ایتھلیٹس کو ٹوکیو جانے سے پہلے دینے کو کہا گیا تھا۔
روس میں ایک دن میں 24 ہزار مزید کیسز رپورٹ، 799 ہلاکتیں
روس میں ہفتے کو کرونا وبا کے لگ بھگ 24 ہزار مزید کیسز رپورٹ اور ایک بار پھر 799 ریکارڈ یومیہ ہلاکتیں رپورٹ کی گئیں۔
روس میں کرونا کیسز میں اضافہ دیکھا جا رہا ہے اور حکام کرونا وائرس کے مہلک قسم ڈیلٹا ویرینٹ کو اس کی وجہ قرار دے رہے ہیں۔
کرونا وبا سے نمٹنے والی ٹاسک فورس نے پچھلے 24 گھنٹوں میں 23 ہزار 947 کیسز کی تصدیق کی۔ جو کہ پچھلے ہفتے کی نسبت 5 فی صد کم ہے۔
ماسکو میں 3 ہزار 376 کیسز رپورٹ کیے گئے۔ جو کہ پچھلے ہفتے کے مقابلے میں 26 فی صد کم ہے۔
خیال رہے کہ روس میں اب تک 61 لاکھ سے زائد کیسز رپورٹ کیے گئے ہیں۔ جب کہ کرونا وبا سے اب تک ایک لاکھ 53 ہزار سے زائد افراد ہلاک ہو چکے ہیں۔
آسٹریلیا میں وبا کے پھیلاؤ، متاثرہ علاقوں کو ویکسین کی مزید خوراکیں فراہم کرنے کا عندیہ
آسٹریلیا کی ریاست نیو ساؤتھ ویلز کے شہر سڈنی کو کرونا کیسز میں اضافے کی وجہ سے فائزر کی مزید 50 ہزار خوراکیں فراہم کی جائیں گی۔
آسٹریلیا میں ہفتے کو مقامی منتقلی کے 176 کیسز رپورٹ کیے گئے۔ جو کہ گزشتہ تین ہفتوں کے دوران مسلسل ریکارڈ اضافہ ہے اور یہ تمام کیسز ریاست نیو ساؤتھ ویلز سے رپورٹ کیے گئے۔
حکام نے اندیشہ ظاہر کیا ہے کہ نیو ساؤتھ ویلز سے رپورٹ کیے جانے والے کیسز ملک بھر میں کیے گئے اقدامات کو نقصان پہنچا سکتے ہیں۔
خیال رہے کہ ایک ماہ کے لیے نافذ کردہ لاک ڈاؤن کے خلاف لگ بھگ 3500 افراد نے احتجاج کیا تھا جن کی اکثریت فیس ماسک کے بغیر تھی۔
واضح رہے کہ آسٹریلیا میں اب تک 32 ہزار سے زائد کیسز اور 916 اموات رپورٹ کی گئی ہیں۔