کرونا وبا سے خواتین کی ملازمتوں کے مواقع میں کمی ہوئی: عالمی ادارہ محنت
عالمی ادارہ محنت نے بتایا ہے کہ 2019 اور 2020 کے دوران خواتین کے روزگار میں عالمی سطح پر چار اعشاریہ دو فیصد یعنی 54 ملین، جب کہ مردوں کو 3 فیصد یعنی 60 ملین ملازمتوں میں کمی کا سامنا کرنا پڑا۔
خواتین کے کام کرنے کے حقوق اور کووڈ-19 کے دوران خواتین کی ملازمتوں پر اقوام متحدہ کی ایک مطالعاتی رپورٹ میں کہا گیا ہے کہ 2019 کے مقابلے میں اس سال خواتین کی ملازمتوں کے مواقع میں 13 ملین کمی ہو گی۔ لیکن یہ امکان موجود ہے کہ مردوں کے روزگار کی تعداد دو سال پہلے کی سطح تک پہنچ جائے۔
مطالعاتی رپورٹ کے مطابق، 2021 میں دنیا بھر میں ملازمت کی قانونی عمر رکھنے والیے 69 فیصد مردوں جب کہ خواتین میں سے صرف 43 فیصد کو ملازمت میسر آئے گی۔
ریسرچ میں کہا گیا ہے کہ خواتین کی ملازمتوں کے تناسب اور آمدنی میں کمی ہوئی ہے، کیونکہ بیشتر خواتین ایسے شعبوں سے وابستہ تھیں جنہیں لاک ڈاؤن کا سامنا کرنا پڑا، جیس میں رہائش اور خوراک کی سروسز کے شعبے اور مینوفیکچرنگ شامل ہیں۔
بڑی تعداد میں امریکی نوکریاں کیوں چھوڑ رہے ہیں؟
کرونا وائرس نے امریکہ میں نوکریوں کی صورتِ حال تبدیل کر دی ہے۔ مختلف شعبوں میں کام کرنے والے بڑی تعداد میں اپنی موجودہ ملازمتیں چھوڑ رہے ہیں۔ ایسے میں کمپنیاں گھر سے یا دفتر آ کر کام کرنے سے متعلق پالیسیوں کا جائزہ لے رہی ہیں۔ مزید دیکھیے سعدیہ زیب رانجھا کی یہ رپورٹ۔
نیویارک: ان ڈور مقامات کا رُخ کرنے والے شہریوں کے لیے ویکسی نیشن پاس لازم قرار
امریکہ کے شہر نیو یارک میں ان ڈور مقامات کا رُخ کرنے والے شہریوں کے لیے ویکسین کارڈ کو لازم قرار دیا گیا ہے۔
نیو یارک کے میئر بِل دی بلاسیو نے منگل کو اعلان کیا ہے کہ ریستوران، جم اور شوز میں شرکت کرنے کے خواہش مند شہریوں کو ویکسین پاس دکھائے بغیر داخلے کی اجازت نہیں ہو گی۔
خبر رساں ادارے ’اے ایف پی‘ کے مطابق بِل دی بلاسیو نے پریس کانفرنس کے دوران کہا کہ اگر آپ نے ویکسی نیشن کروا لی ہے تو آپ کے پاس چابی ہے جس کے ذریعے آپ دروازہ کھول سکتے ہیں۔ لیکن اگر آپ کی ویکسی نیشن نہیں ہوئی تو بد قسمتی سے آپ متعدد چیزوں میں حصہ لینے کے اہل نہیں ہوں گے۔
نیو یارک شہر کے میئر کا کہنا ہے کہ ہیلتھ پاس کا اجرا 16 اگست سے کیا جائے گا۔
پاکستان میں ایک روز میں یومیہ ویکسی نیشن کا نیا ریکارڈ
پاکستان میں کرونا وائرس کے پھیلاؤ کو روکنے کے لیے ویکسی نیشن کا عمل جاری ہے۔ منگل کو ملک بھر میں 11 لاکھ 39 ہزار 580 افراد کو کرونا ویکسین لگائی گئی جو ایک روز میں ویکسی نیشن کا نیا ریکارڈ ہے۔
ملک میں کرونا وائرس کی روک تھام کے لیے حکمت عملی مرتب کرنے والے نیشنل کمانڈ اینڈ آپریشن سینٹر (این سی او سی) کے مطابق پاکستان میں اب تک تین کروڑ 30 لاکھ 59 ہزار 676 افراد کو ویکسین لگائی جا چکی ہے۔
کرونا وائرس کے انسداد کے لیے سائنو فام، سائنو ویک، ایسٹرازینیکا، موڈرنا اور فائزر ویکسین لگائی جا رہی ہے۔