امریکہ ویکسین کی 11 کروڑ خوراکیں عطیہ کر چکا ہے: صدر بائیڈن
امریکہ کے صدر جو بائیڈن نے کہا ہے کہ امریکہ اب تک دنیا کے 65 ممالک کو کرونا وائرس سے بچاؤ کی 11 کروڑ خوراکیں فراہم کر چکا ہے۔
منگل کو وائٹ ہاؤس میں صحافیوں سے گفتگو کرتے ہوئے صدر بائیڈن نے کہا کہ یہ امداد روس اور چین سمیت ویکسین عطیہ کرنے والے 24 ممالک سے بھی زیادہ ہے۔
اُن کا کہنا تھا کہ امریکہ ویکسین کے بدلے کسی ملک سے کسی رعایت کا مطالبہ نہیں کر رہا بلکہ یہ صرف مہلک وبا کے خاتمے کی کوششوں کی ایک کڑی ہے۔
وائس آف امریکہ کی جانب سے پوچھے گئے اس سوال کے کیا دیگر زیادہ آمدنی والے ممالک کو بھی امریکہ کی پیروی کرتے ہوئے ویکسین عطیہ کرنی چاہیے؟ صدر بائیڈن نے کہا کہ ایسے ممالک جو اپنی ضرورت پوری کر چکے ہیں، اُنہیں 100 کے لگ بھگ غریب ممالک کی مدد کرنی چاہیے۔ چاہے وہ ڈالرز کی شکل میں ہو یا ویکسین کی صورت میں فراہم کی جائے۔
انڈونیشیا میں کرونا سے ہلاکتوں کی تعداد ایک لاکھ سے متجاوز
انڈونیشیا میں کرونا وائرس سے ہونے والی ہلاکتوں کی تعداد ایک لاکھ سے بڑھ گئی ہے جب کہ ڈیلٹا ویریئنٹ کے باعث نئے کیسز میں بھی اضافہ ہو رہا ہے۔
وبا کے آغاز سے لے کر رواں برس مئی تک انڈونیشیا میں کرونا سے 50 ہزار ہلاکتیں ہوئی تھیں۔ تاہم نو ہفتے بعد یہ تعداد اب دگنا ہو گئی ہے۔
انڈونیشیا کی وزارتِ صحت کے مطابق بدھ کو ملک میں کرونا کے باعث مزید 1747 ہلاکتیں ہوئی جس کے بعد ہلاکتوں کی مجموعی تعداد ایک لاکھ 635 ہو گئی ہے۔
عالمی ادارۂ صحت (ڈبلیو ایچ او) نے انڈونیشیا کی صورتِ حال پر تشویش کا اظہار کرتے ہوئے اسپتالوں میں آکسیجن، انتہائی نگہداشت کے وارڈز میں اضافے اور دیگر اقدامات کرنے پر زور دیا ہے۔
فلوریڈا: کیسز میں اضافے کے سبب اسپتالوں میں بحرانی صورتِ حال
امریکہ کی ریاست فلوریڈا میں کرونا کیسز میں اضافے کے سبب اسپتالوں کو بحرانی صورتِ حال کا سامنا ہے۔
ریاست فلوریڈا کے اسپتالوں میں جو مریض لائے جا رہے ہیں ان میں سے زیادہ تر نوجوان اور ایسے مریض ہیں جنہوں نے ویکسین نہیں لگوا رکھی جب کہ زیادہ تر مریضوں کو کرونا کی قسم ڈیلٹا کا سامنا ہے جو امریکہ کے جنوبی ریاستوں میں تیزی سے پھیل رہی ہے۔
امریکہ میں سینٹر فار ڈیزیز اینڈ کنٹرول (سی ڈی سی) کی ڈائریکٹر روشیل ولنسکی نے وائرس کی اس قسم کو سب سے زیادہ تیزی سے پھیلنے والی قسم قرار دیتے ہوئے کہا ہے کہ ڈیلٹا ویریئنٹ ان لوگوں کو بھی متاثر کر سکتا ہے جنہوں نے ویکسین لگوا رکھی ہے۔
یونیورسٹی آف الاباما کے اسسٹنٹ پروفیسر آف میڈیسن ڈاکٹر ریکارڈو فرینکو کا کہنا ہے کہ یونیورسٹی آف الاباما اسپتال میں کرونا کے جتنے مریض لائے جا رہے ہیں ان میں سے 97 فی صد ایسے افراد ہیں جنہوں نے ویکسین نہیں لگوائی۔
ان کے بقول ڈیلٹا ویریئنٹ اصل کرونا وائرس کی نسبت دو گنا تیزی سے پھیلنے والی قسم ہے۔
سابق امریکی صدر براک اوباما نے ساٹھویں سالگرہ کی تقریب کو محدود کر دیا
امریکہ میں کرونا وائرس کے بڑھتے ہوئے کیسز کے پیشِ نظر سابق صدر براک اوباما نے میسی چیوسٹس میں موجود رہائش گاہ پر اپنی ساٹھویں سالگرہ کی تقریب کو محدود کر دیا ہے۔
سابق امریکی صدر بدھ کو 60 برس کے ہو گئے۔
اس موقع پر براک اوباما اور سابق خاتون اوّل مشعل اوبامہ نے مارتھاز وائن یارڈ میں تعطیلات کے لیے بنائے گئے گھر پر 475 افراد کو مدعو کر رکھا تھا لیکن اب وہ مہمانوں کی فہرست کو خاندان کے افراد اور قریبی دوستوں تک محدود کر رہے ہیں۔
میڈیا رپورٹس کے مطابق مہمانوں کی ابتدائی فہرست میں متوقع طور پر براک اوباما کے سابق معاونین، اہم ڈیموکریٹک رہنما، جارج کالونی اور اوپرا ونفری جیسے شوبز ستارے بھی شامل تھے۔
تاہم یہ معلوم نہیں ہو سکا ہے کہ مہمانوں کی اس فہرست میں کون کون سی شخصیات شامل ہیں۔
ری پبلکن رہنماؤں کی جانب سے شکایات سامنے آ رہی تھیں کہ براک اوباما ملک کے اندر بڑھتے ہوئے کرونا کیسز کو نظر انداز کر رہے ہیں۔