آسٹریلیا میں کرونا کیسز کا نیا ریکارڈ، وزیراعظم کا لاک ڈاؤن حکمت عملی کا دفاع
آسٹریلیا میں کرونا وائرس کا پھیلاؤ تیز ہو گیا ہے اور ملک میں ایک روز میں 914 نئے کیسز کی تصدیق ہوئی ہے جو یومیہ کیسز کا نیا ریکارڈ ہے۔
خبر رساں ادارے 'رائٹرز' کے مطابق آسٹریلوی ریاست نیو ساؤتھ ویلز، وکٹوریا اور آسٹریلین کیپیٹل ٹیریٹری میں لاک ڈاؤن نافذ ہے۔ البتہ آسٹریلوی وزیرِاعظم نے اس لاک ڈاؤن حکمتِ عملی کا دفاع کیا ہے۔
وزیرِاعظم اسکاٹ موریسن نے اتوار کو کہا ہے کہ آسٹریلیا کرونا وائرس کے خلاف اپنی لاک ڈاؤن کی حکمتِ عملی تب تک برقرار رکھے گا جب تک اس کی 70 فی صد آبادی کی ویکسی نیشن مکمل نہیں ہو جاتی۔ لیکن اس کے بعد انہیں وائرس کے ساتھ رہنا شروع کرنا ہو گا۔
انہوں نے ایک ٹیلی ویژن انٹرویو میں کہا کہ آپ ہمیشہ لاک ڈاؤن کے ساتھ نہیں رہ سکتے اور کچھ مواقع پر آپ کو حکمتِ عملی تبدیل کرنے کی ضرورت ہو گی۔ اور یہ 70 فی صد ویکسی نیشن پر ہو سکتی ہے۔
ایران: کرونا پابندیوں کے ہٹنے کے بعد اموات میں اضافہ، 684 افراد ہلاک
ایران میں کرونا وائرس کے پھیلاؤ کو روکنے کے لیے لگائی گئی پابندیوں کے ہٹنے کے بعد ملک میں پہلی مرتبہ 680 سے زائد اموات رپورٹ ہوئی ہیں۔
خبر رساں ادارے 'اے ایف پی' کی رپورٹ کے مطابق ایران کی وزارتِ صحت نے اتوار کو بتایا کہ ملک میں گزشتہ 24 گھنٹوں میں 684 اموات رپورٹ ہوئی ہیں جس کے بعد مجموعی اموات کی تعداد ایک لاکھ دو ہزار 38 ہوگئی ہے۔
ایران میں کرونا وائرس سے مزید 36 ہزار 419 افراد متاثر بھی ہوئے ہیں۔ ملک میں اب تک کرونا کیسز کی مجموعی تعداد 46 لاکھ 77 ہزار 114 ہو چکی ہے۔
پاکستان میں کرونا وائرس سے ہلاکتوں کی مجموعی تعداد 25 ہزار ہوگئی
نیشنل کمانڈ اینڈ آپریشن سینٹر(این سی او سی) کے مطابق پیر کو کرونا وائرس سے 80 ہلاکتیں ہوئیں جس کے بعد اس وبا سے ہونے والی اموات کی تعداد 25 ہزار تین ہوگئی ہے۔
گزشتہ 24 گھنٹوں کے دوران ملک میں کرونا وائرس کے 3772 کیسز سامنے آئے۔ این سی او سی کے مطابق ملک میں وبا کے پھیلاؤ کی شرح سات فی صد ہوگئی ہے۔
پاکستان میں کرونا سے متاثر ہونے والوں کی مجموعی تعداد 11 لاکھ 27 ہزار سے زائد ہے جب کہ فعال کیسز کی تعداد 89 ہزار 919 ہے۔
سندھ میں 30 اگست سے 100 فی صد ویکسی نیشن کرانے والے اسکول کھولنے کا اعلان
سندھ کے وزیر تعلیم سید سردار علی شاہ نے 30 اگست سے سو فیصد ویکسی نیشن کرانے والے اسکول کھولنے کا اعلان کردیا۔
وزیر تعلیم نے نجی اسکول ایسوی ایشن کے نمائندوں کے ساتھ پریس کانفرس کرتے ہوئے کہا کہ نجی تعلیمی اداروں کے 80 فی صد عملے کی ویکسی نیشن ہوچکی ہے۔
انہوں نے کہا کہ جن بچوں کے والدین ویکسین لگوا چکے ہیں صرف انہیں اسکول آنے کی اجازت ہوگی۔ بچوں کے والدین کو اسکول میں نادرا کا جاری کردہ ویکسی نیشن سرٹیفکیٹ جمع کرانا ہوگا۔
انہوں نے کہا کہ اسکول 50 فی صد حاضری کے ساتھ ہفتے میں چھ روز تک کھولے جائیں گے۔