فائزربائیو این ٹیک کو کرونا کی باقاعدہ ویکسین کے طور پر منظوری مل گئی
یو ایس فوڈ اینڈ ڈرگ ایڈمنسٹریشن (ایف ڈی اے) نے پیر کے روز فائزر اور جرمن پارٹنر بائیو این ٹیک کی جانب سے 16 سال سے زائد عمر کے لوگوں میں استعمال کے لیے بنائی گئی کووڈ 19 ویکسین کی مکمل منظوری دے دی ہے۔ اس طرح وہ کرونا سے بچاؤ کی پہلی باقاعدہ منظور شدہ ویکسین بن گئی ہے۔
اس سے قبل زیرِ استعمال تمام ویکسینز کو ایمرجنسی کے تحت لگانے کی اجازت دی گئی تھی۔
فائزر اینڈ بائیواین ٹیک کی ویکسین گزشتہ برس دسمبر سے شہریوں کو لگائی جا رہی ہے۔ 22 اگست 2021 تک کے اعداد و شمار کے مطابق امریکہ میں یہ ویکسین اب تک 20 کروڑ 40 لاکھ سے زیادہ افراد کو لگائی جا چکی ہے۔
فائزر کے ساتھ ساتھ جن ویکسینز کو ایمرجنسی کے تحت لگانے کی اجازت دی گئی تھی ان میں سے کسی کو ابھی تک فوڈ اینڈ ڈرگ ایڈمنسٹریشن (ایف ڈی اے) کی جانب سے مکمل منظوری نہیں ملی۔
بھارت میں کرونا سے 354 اموات
بھارت میں گزشتہ 24 گھنٹوں کے دوران کرونا سے 354 اموات ہوئی ہیں جس کے بعد ملک میں ہلاکتوں کی مجموعی تعداد چار لاکھ 35 ہزار 110 ہو گئی ہے۔
سرکاری اعداد و شمار کے مطابق ملک میں 24 گھنٹوں کے دوران 25 ہزار 467 افراد میں کرونا کی تشخیص ہوئی ہے۔
بھارت میں کرونا کے یومیہ مثبت کیسز کی شرح ایک اعشاریہ پانچ پانچ فی صد ریکارڈ کی گئی ہے۔
ملک میں کرونا سے مزید 39 ہزار 486 مریض صحت یاب بھی ہوئے ہیں۔
نیوزی لینڈ میں گزشتہ برس اپریل کے بعد سب سے زیادہ کیسز رپورٹ
نیوزی لینڈ میں منگل کو گزشتہ برس اپریل کے بعد سب سے زیادہ کیسز رپورٹ ہوئے ہیں۔
وزارتِ صحت کی جانب سے جاری اعداد و شمار کے مطابق ملک میں منگل کو 41 نئے کیسز رپورٹ ہوئے ہیں۔
ڈائریکٹر جنرل ہیلتھ ایشلے بلوم فیلڈ نے ایک نیوز کانفرنس کے دوران کہا کہ کرونا کیسز کی یہ تعداد 10 اپریل 2020 کے بعد سب سے زیادہ ہے۔
خبر رساں ادارے 'رائٹرز' کے مطابق منگل کو رپورٹ ہونے والے کیسز 41 کیسز میں سے 38 آکلینڈ شہر سے سامنے آئے ہیں جب کہ دیگر تین کیسز دارالحکومت ولنگٹن سے رپورٹ ہوئے ہیں۔
پاکستان: 15 برس سے زائد عمر کے نوجوانوں کی ویکسی نیشن کا فیصلہ
پاکستان میں 15 برس سے زائد عمر کے نوجوانوں کی ویکسی نیشن کا فیصلہ کیا گیا ہے۔
پاکستان میں کرونا وبا کے نگراں ادارے نیشنل کمانڈ اینڈ آپریشن سینٹر (این سی او سی) کے سربراہ اسد عمر نے ٹوئٹر پر جاری بیان میں کہا ہے کہ "منگل کو اجلاس میں 15 برس اور اس سے زائد عمر کے نوجوانوں کو ویکسین لگانے کا فیصلہ کیا ہے۔"
اسد عمر کے مطابق ملک میں 17 برس کی عمر کے نوجوانوں کی ویکسی نیشن کا آغاز یکم ستمبر سے کیا جائے گا جب کہ 15 اور 16 برس کے نوجونواں کی ویکسی نیشن کی تاریخ کا اعلان بعد میں کیا جائے گا۔