دنیا بھر میں کرونا وائرس سے ہونے والی مجموعی اموات 45 لاکھ سے تجاوز کرگئیں
عالمی سطح پر کرونا وائرس سے مجموعی طور پر ہونے والی ہلاکتیں 45 لاکھ سے تجاوز کرگئیں۔
خبر رساں ادارے اے ایف پی کے اعداد و شمار کے مطابق دسمبر 2019 میں چین میں پھوٹنے والی کرونا وائرس کی وبا سے ہلاک ہونے والوں کی تعداد 45 لاکھ 620ہوگئی ہے۔
دنیا میں کرونا وبا کے ڈیلٹا ویریئنٹ کے پھیلاؤ بھی جاری ہے۔ عالمی سطح پر کرونا سے یومیہ ہلاکتیں 10 ہزار پر آگئی ہیں جب کہ رواں سال جنوری میں روزانہ ہونے والی ہلاکتیں 14 ہزار 800 ہوگئی تھیں۔
گزشتہ ہفتے کے دوران یومیہ 1290 اموات کے ساتھ امریکہ میں ایک بار پھر دنیا میں کرونا سے ہونے والی ہلاکتیں دیگر ممالک سے زیادہ ہوگئی ہیں۔
پاکستان میں اگست میں 2467 اموات
پاکستان میں گزشتہ ایک ماہ میں کرونا وائرس سے لگ بھگ دو ہزار چار سو 67 اموات ہوئی ہیں۔
سرکاری اعداد و شمار کے مطابق اگست کے مہینے میں سب سے زیادہ 141 یومیہ اموات 24 اگست کو ہوئی تھیں۔
واضح رہے کہ ملک بھر میں اب تک 25 ہزار 889 افراد کرونا وبا سے ہلاک ہو چکے ہیں۔
پاکستان ریلوے: 15 ستمبر سے ویکسی نیشن والے مسافروں کو سفر کی اجازت ہو گی
پاکستان ریلوے نے کہا ہے کہ 15 ستمبر 2021 تک ویکسی نیشن کی کم از کم ایک ڈوز لگوانے والے اور 15 اکتوبر تک مکمل ویکسی نیشن والے مسافروں کو سفر کرنے کے اجازت ہو گی۔
ترجمان پاکستان ریلوے کے ایک بیان میں کہا گیا ہے کہ 15 ستمبر کے بعد ویکسی نیشن نہ کرانے والے مسافروں کو ٹکٹ جاری نہیں کیے جائیں گے۔ اگر کوئی مسافر ٹکٹ چیکنگ کے دوران بغیر ویکسی نیشن کے شناخت ہوا تو ٹکٹ چیکر اور متعلقہ اسٹاف کے خلاف کارروائی ہوگی۔
بیان میں واضح کیا گیا ہے کہ ویکسی نیشن موبائل ٹیمیں اسٹیشنز پر موجود ہوں گی۔
یہ بھی کہا گیا ہے کہ 15 ستمبر 2021 تک ویکسی نیشن کی کم از کم ایک ڈوز اور 15 اکتوبر تک مکمل ڈوز ٹرین اسٹاف اور اسٹیشن کی حدود میں موجود عملے کو لگوانا ضروری ہے۔
پاکستان میں ایک دن میں ریکارڈ 15 لاکھ افراد کی ویکسی نیشن
پاکستان میں حکام نے کہا ہے کہ ملک بھر میں گزشتہ 24 گھنٹوں میں ریکارڈ 15 لاکھ 90 ہزار افراد کو ویکسین لگائی گئی۔
این سی او سی کے مطابق 31 اگست کو ملک بھر میں ریکارڈ ویکسی نیشن کی گئی ہے جس میں 10 لاکھ سے زائد افراد کو ویکسین کی پہلی ڈوز لگائی گئی جب کہ لگ بھگ پانچ لاکھ افراد کو دوسری ڈوز دی گئی۔
واضح رہے کہ پاکستان میں اب تک ایک کروڑ 74 لاکھ 55 ہزار افراد کی ویکسی نیشن مکمل ہو چکی ہے جب کہ چار کروڑ 37 لاکھ 92 ہزار افراد کو ویکسین کی پہلی ڈوز دی جا چکی ہے۔