فائزر ویکسین کی تیسری ڈوز سے قوت مدافعت میں اضافہ
امریکہ کی فوڈ اینڈ ڈرگ ایڈمنسٹریشن (ایف ڈی اے) کا کہنا ہے کہ فائرز ویکسین کی تیسری ڈوز لینے سے قوت مدافعت میں اضافہ ہوتا ہے۔
ایف ڈی اے نے ایک مطالعے کے حوالے سے کہا کہ ویکسین کی تیسری ڈوز 300 سے زائد افراد کو دی گئی۔ ان افراد کی قوتِ مدافعت گزشتہ خوراکوں سے تین گنا بڑھی تھی۔ جب کہ تیسری ڈوز سے قوت مدافعت میں پانچ گنا اضافہ ہوا۔
فائزر نے بھی اسرائیل میں ہونے والی ایک تحقیق کا حوالہ دے کر کہا کہ 60 برس یا اس سے زائد عمر کے ایسے افراد جن کو ویکسین کی تیسری ڈوز دی گئی تھی ان کے وبا سے متاثر ہونے کے امکانات 11 گنا کم ہو گئے تھے۔
چین کے مشرقی شہر میں پابندیاں عائد
چین کے جنوب مشرقی شہر ژیامن میں حکام نے ہفتے کو کرونا وبا میں اضافے کے سبب شہریوں سے کہا ہے کہ وہ گھروں میں رہیں۔ حکومت نے متعدد مقامات بند کر دیے ہیں جہاں چھٹیوں کے دوران کرونا کیسز میں اضافہ ہو سکتا ہے۔
مقامی حکومت کی طرف سے جاری کردہ نوٹس میں کہا گیا ہے کہ شہری غیر ضروری طور پر گھروں سے نہ نکلیں اور حکومت نے پارکس، تفریح گاہیں اور کھیلوں کے میدان بند جب کہ دیگر تقریبات پر پابندیاں عائد کر دی ہیں۔
حکام کی طرف سے یہ پابندیاں موسم خزاں کے حوالے سے ہونے والی تقریبات پر چھٹیوں کے موقع پر لگائی گئی ہیں۔ جب پورے ملک میں سیاحتی سیزن کا عروج ہوتا ہے۔
خیال رہے کہ ژیامن، جو کہ 50 لاکھ آبادی والا ایک خوب صورت شہر ہے، فوجیان صوبے کے چار بڑے شہروں میں سے ایک ہے۔ یہاں سے حالیہ دنوں میں کرونا کیسز رپورٹ ہو رہے ہیں۔
ممبئی کی 90 فی صد آبادی میں کرونا کے خلاف اینٹی باڈیز موجود ہیں: سروے
بھارت کے مالیاتی مرکز ممبئی میں ایک اندازے کے مطابق 90 فی صد آبادی میں کرونا کے خلاف اینٹی باڈیز موجود ہیں۔
ایک سماجی گروپ کے تحت کرائے گئے ایک سروے کے نتائج جمعے کے روز جاری کیے گئے، جن میں کہا گیا ہے کہ شہر کی آبادی کے 90 فی صد کے لگ بھگ افراد کےخون میں کووڈ-19 کے خلاف اینٹی باڈیز موجود ہیں۔
یہ ایٹنی باڈیز اس وقت پیدا ہوتی ہیں جب کوئی شخص کرونا سے بچاؤ کی ویکسین لگواتا ہے یا پھر کرونا میں مبتلا ہو جاتا ہے۔
اینٹی باڈیز کی جانچ کے لیے یہ سروے اگست کے وسط سے ستمبر کے آغاز تک جاری رہا جس میں 8674 افراد کے خون کے نمونے حاصل کیے گئے، جن میں سے 65 فی صد افراد ایسے تھے جنہیں کرونا سے بچاؤ کے ٹیکے لگ چکے تھے۔
اس سروے سے یہ بھی ظاہر ہوا ہے کہ اینٹی باڈیز رکھنے والے مردوں کے مقابلے میں خواتین کی تعداد زیادہ تھی۔ یہ سطح خواتین میں 88 اعشاریہ 29 فی صد جب کہ مردوں میں 85 اعشاریہ 07 فی صد تھی۔