پاکستان میں پانچ ہزار سے زیادہ کیسز رپورٹ
بھارت: مثبت کیسز کی شرح 14 فی صد سے زائد
بھارت میں کرونا کیسز میں اضافہ ہو رہا ہے۔ گزشتہ چوبیس گھنٹوں کے دوران دو لاکھ 38 ہزار سے زیادہ کیسز رپورٹ ہوئے ہیں۔
بھارت کی وزارتِ اطلاعات کے مطابق ملک میں گزشتہ چوبیس گھنٹوں کے دوران کرونا کیسز کی شرح چودہ اعشاریہ چار تین ریکارڈ کی گئی ہے۔
پاکستان کے چار شہروں میں کرونا کی شرح 10 فی صد سے زائد
پاکستان کے چار بڑے شہروں میں کرونا وائرس کے ٹیسٹ مثبت آنے کی شرح 10 فی صد سے تجاوز کر گئی ہے۔
مقامی میڈیا کی رپورٹس کے مطابق آبادی کے لحاظ سے ملک کے سب سے بڑے شہر کراچی سمیت حیدر آباد، لاہور اور وفاقی دارالحکومت اسلام آباد میں ٹیسٹ مثبت آنے کی شرح 10 فی صد سے زائد ہے۔
دوسری جانب نیشنل کمانڈ اینڈ کنٹرول سینٹر (این سی او سی) نے شہریوں پر زور دیا ہے کہ وہ احتیاطی تدابیر پر عمل کریں۔
پاکستان میں کرونا سے مزید 10 اموات
پاکستان میں کرونا وائرس سے مزید 10 افراد ہلاک ہوئے ہیں۔
سرکاری اعداد و شمار کے مطابق گزشتہ 24 گھنٹوں میں ہونے والی اموات کے بعد ہلاکتوں کی مجموعی ہلاکتیں 29 ہزار 29 ہو گئی ہیں۔
خیال رہے کہ گزشتہ برس اکتوبر کے وسط سے پاکستان میں وبا سے اموات کی شرح میں کمی آنا شروع ہو گئی تھی جس میں کافی حد تک کمی آ بھی گئی تھی البتہ اب اس میں ایک بار پھر اضافہ ہو رہا ہے۔