امریکہ کے صدر ڈونلڈ ٹرمپ اپنے پہلے دورۂ بھارت کے موقع پیر کو احمد آباد پہنچے تھے جہاں انہوں نے مختلف مقامات کا دورہ کیا۔ بعد ازاں وہ آگرہ بھی گئے اور مغلیہ دور میں تعمیر کی گئی محبت کی نشانی 'تاج محل' کو بھی دیکھا۔
بھارتی سر زمین پر صدر ٹرمپ کی مصروفیات
1
صدر ٹرمپ اور خاتون اوّل میلانیا ٹرمپ نے آگرہ میں قائم تاج محل کا دورہ کیا اور مغلیہ فن تعمیر کی تعریف بھی کی۔
2
تاج محل کئی صدیوں سے محبت کی نشانی تصور کیے جانے کے ساتھ ساتھ بھارت کے دورے پر آئے ہوئے تمام غیر ملکی حکمرانوں کی دلچسپی کا مرکز رہا ہے۔ بہت کم حکمراں ایسے ہوں گے جنہوں نے تاج محل کا دورہ نہ کیا ہو۔ صدر ڈونلڈ ٹرمپ اور خاتون اوّل میلانیا نے بھی وہاں تصاویر اتروائیں۔
3
صدر ٹرمپ اپنی اہلیہ اور وزیرِ اعظم نریندر مودی کے ہمراہ بھارت کے بانی رہنما موہن داس کرم چند گاندھی کی رہائش گاہ ' گاندھی آشرم' پہنچے اور وہاں رکھی گئی مہمانوں کی کتاب میں اپنے تاثرات قلم بند کیے۔
4
گاندھی آشرم کے دورے کے موقع پر وزیرِ اعظم نریندر مودی نے وہاں موجود ایک چرخے سے متعلق تفصیلات سے صدر ٹرمپ اور خاتونِ اوّل میلانیا ٹرمپ کو آگاہ کیا۔ بھارت کی آزادی کے ہیرو 'گاندھی' کا چرغے پر سوت یعنی روئی کاتنا معمول تھا۔ سادگی کو عام کرنے کی غرض سے انہوں نے زندگی بھر کھدر سے بنے سوتی کپڑے پہنے جنہیں حرفِ عام میں کھادی ملبوسات کہا جاتا ہے۔ اس دور میں کھادی کا کپڑا بننے کے لیے چرغا چلانا روایات میں شامل تھا۔