فلاڈیلفیا فائرنگ: مسلح شخص کئی گھنٹے بعد گرفتار
فلاڈیلفیا میں بدھ کو پولیس اہلکار جب ایک شخص کو گرفتار کرنے پہنچے تو انہیں مزاحمت کا سامنا کرنا پڑا۔ مسلح شخص نے پولیس اہلکاروں پر فائرنگ کی جس سے 6 اہلکار زخمی ہوئے۔
پولیس اہلکاروں نے مسلح شخص کو متعدد بار خبردار کیا اور ہتھیار پھینک کر گرفتاری دینے کو کہا لیکن حملہ آور نے فائرنگ جاری رکھی۔
پولیس نے کئی گھنٹوں بعد مسلّح حملہ آور کو گرفتار کر کے علاقے کو کلیئر کر دیا ہے۔
مسلح شخص کو وکیل کے ذریعے یقین دہانی بھی کرائی گئی کہ ہتھیار ڈالنے کی صورت میں اسے کسی قسم کا نقصان نہیں پہنچایا جائے گا۔
ملزم کی فائرنگ سے دو پولیس اہلکار ایک گھر میں پھنس گئے جنہیں چار گھنٹوں بعد بحفاظت نکال لیا گیا۔
فلاڈیلفیا کے پولیس ترجمان کے مطابق زخمی ہونے والے متعدد اہلکاروں کو معمولی زخم آئے ہیں جنہیں فوری طبّی امداد کے بعد اسپتال سے فارغ کر دیا گیا۔
جائے وقوعہ پر گاڑی کے حادثے میں زخمی ہونے والے ایک پولیس اہلکار کو شدید زخم آئے ہیں اور وہ بدستور اسپتال میں زیرِ علاج ہے۔
پولیس کے مخصوص دستوں نے فائرنگ کرنے والے شخص کے گھر کی طرف جانے والے راستوں کو فوری طور پر بند کر دیا تھا۔