بھارت میں سمندری طوفان، ممبئی سے خطرہ ٹل گیا

بھارت میں اتنی شدت کا طوفان 70 سال قبل آیا تھا۔ بحیرہ عرب میں آنے والے اس طوفان کو  'نسار گا' کا نام دیا گیا ہے۔ اس کی رفتار 120 کلومیٹر فی گھنٹہ تھی۔
 

بھارت کے تجارتی مرکز اور ساحلی شہر ممبئی میں سارا دن گھنے بادل چھائے رہے اور تیز ہواؤں کے ساتھ موسلا دھار بارش ہوئی۔ تاہم، اس کے نتیجے میں کسی جانی نقصان کی اطلاع نہیں ملی ہے۔
 

بھارت کے محکمہ موسمیات نے بدھ کی شام کو اطلاع دی کہ طوفان کا رخ کسی اور سمت ہو گیا ہے اور اب ممبئی کے لیے کوئی خطرہ نہیں ہے۔
 

ممبئی میں طوفان کے باعث کچھ جگہوں پر تیزہواؤں سے درخت اکھڑ گئے جس سے ٹریفک کی روانی متاثر ہوئی۔ 
 

طوفان آنے سے پیشتر یہ تشویش پائی جاتی تھی کہ کرونا وائرس کا زور علاقے میں بڑھ رہا ہے اور ان حالات میں طبی سہولتوں کو اگر کوئی نقصان پہنچا تو حالات سنبھالنا مشکل ہو جائے گا۔

 

ممبئی کی بلند و بالا عمارتیں بدھ کو گہرے کالے بادلوں میں گری رہی ہیں جب کہ اس دوران آسمانی بجلی بھی چمکتی رہی۔
 

طوفان سے  قبل مہاراشٹر اور گجرات کی صوبائی حکومتوں نے نشیبی رہائشی علاقوں کو خالی کرا لیا تھا جس سے حکام کے بقول زیادہ نقصان نہیں ہوا۔

 

شہر کی بیشتر سڑکیں ویران رہیں تاہم بارش کے باوجود کچھ شہری ایک جگہ سے دوسری جگہ آتے جاتے رہے۔

طوفان سے قبل ہی ممبئی کے جوہو نامی ساحل پر لائف گارڈز تعینات کردیئے گئے تھے۔ عوام کو سمندر کا رخ کرنے سے روک دیا گیا تھا۔