بھارت: کرنسی نوٹ تبدیل کرنے کا آخری دن

بھارت میں 1000 اور 500 روپے کے پرانے نوٹوں کو بینک میں تبدیل کرانے کا آج (جمعہ کو) آخری دن ہے۔

بھارت کے تقریباً سبھی بینکوں میں کرنسی نوٹ تبدیل کرانے والوں کی لمبی قطاریں لگی ہوئی ہیں۔

عام لوگوں کو نقد کرنسی کی شدید قلت کا سامنا ہے جس سے اُنھیں روز مرہ کے لین دین میں شدید مشکلات پیش آئیں۔

بھارتی حکومت نے دو ہزار روپے کا نیا کرنسی نوٹ متعارف کروایا ہے۔

وزیراعظم نریندر مودی کا کہنا تھا کہ ان کرنسی نوٹ کو ختم کرنے کا مقصد بدعنوانی اور جعلی کرنسی سے نمٹنے کی کوششوں کا حصہ ہے۔

وزیراعظم نریندر مودی نے آٹھ نومبر کی رات کو اچانک 1000 اور 500 روپے کے کرنسی نوٹ بند کرنے کا اعلان کیا تھا۔

ایک ہزار اور پانچ سو روپے کے کرنسی نوٹ کو بند کرنے کے اعلان کے بعد سے اب تک مستقل بینکوں کے باہر افرا تفری کا ماحول رہا ہے۔

ہزاروں لوگوں نے ملک بھر میں حکومت کی جانب سے بڑی مالیت کے کرنسی نوٹ منسوخ کرنے کے متنازع اقدام کے خلاف مظاہرے بھی کیے تھے۔