تصاویر: لاس ویگاس میں کانسرٹ پر حملہ

حکام کے مطابق واقعہ اتوار کی شب لاس ویگاس کے منڈالے بے کسینو کے باہر پیش آیا جو شہر کی اس مشہور پٹی پر واقع ہے جہاں لاس ویگاس کے مشہور جوا خانے موجود ہیں

فائرنگ کے دو گھنٹے بعد لاس ویگاس میٹروپولیٹن پولیس نے اعلان کیا کہ فائرنگ کرنے والا شخص پولیس کے ساتھ مقابلے میں مارا گیا ہے

پولیس کے ٹوئٹر اکاؤنٹ سے جاری ہونے والے اعلان کے مطابق پولیس کا خیال ہے کہ علاقے میں کوئی اور حملہ آور موجود نہیں ہے

اس سے قبل بعض عینی شاہدین نے دعویٰ کیا تھا کہ حملہ آوروں کی تعداد دو تھی جو فائرنگ کے بعد ہوٹل کی بالائی منزلوں کی جانب فرار ہوگئے تھے

لاس ویگاس پولیس کے شیرف جوزف لمبارڈو نے صحافیوں کوبتایا ہے کہ حملہ آور لاس ویگاس کا ہی ایک مقامی شخص ہے جس کی شناخت پولیس نے تاحال ظاہر نہیں کی ہے

پولیس کا خیال ہے کہ حملہ آور نے اکیلے ہی فائرنگ کی البتہ اس کی ایک مبینہ مددگار ایشیائی نژاد خاتون کو تلاش کیاجارہا ہے

حکام کے مطابق واقعہ 'راؤٹ 91 ہارویسٹ فیسٹول' کے عنوان سے ہونے والے لوک موسیقی کے تین روزہ میلے کے اختتامی لمحات میں پیش آیا جس میں ہزاروں افراد شریک تھے

کانسرٹ میں موجود ایک شخص نے واقعے کی ویڈیو انٹرنیٹ پر اپ لوڈ کی ہے جس میں ہوٹل کے باہر ہونے والے کانسرٹ میں لوک گلوکار جیسن آلڈین اپنے فن کا مظاہرہ کر رہے ہیں کہ اسی دوران فائرنگ کی آواز آتی ہے اور کانسرٹ میں بھگدڑ مچ جاتی ہے

لاس ویگاس پولیس کے مطابق پولیس کو فائرنگ کی اطلاع مقامی وقت کے مطابق 10:45 کے لگ بھگ ملی تھی جس کے فوراً بعد پولیس کے خصوصی دستے جائے واقعہ پہنچ گئے تھے