پاک افغان سرحدی راستوں کے ذریعے آمد و رفت بحال
منگل کی صبح پاک افغان سرحد کو طورخم اور چمن کے مقامات پر تمام قسم کی آمد و رفت کے لیے کھول دیا گیا ہے۔
وزیراعظم نواز شریف نے جذبہ خیر سگالی کے طور پر پاک افغان سرحدی راستے فوری طور پر دوبارہ کھولنے کے احکامات جاری کیے۔
سرحدی راستے کھلنے کے بعد ایک ماہ سے زائد عرصے سے پھنسے ٹرک اور کنٹینروں کو بھی سرحد کے آر پار آنے جانے کی اجازت دی گئی۔
پاکستان نے 16 فروری سے افغانستان سے اپنی سرحد ہر طرح کی آمد و رفت کے لیے بند کر دی تھی۔
عام شہریوں کو چیکنگ کے بعد سرحد عبور کرنے کی اجازت دی جا رہی ہے۔
آٹا، چاول، ادویات سے لیکر عام استعمال کی کئی اشیاء پاکستان سے افغانستان جاتی ہیں۔
سرحد کی بندش سے نا صرف عام شہری بلکہ تاجروں کی مشکلات میں بھی اضافہ ہو گیا تھا۔
سرحد کی اچانک بندش کی وجہ سے دونوں جانب ہزاروں افراد پھنس گئِے تھے اور انسانی ہمدردی کی بنیادوں پر سرحد کھولنے کے مطالبات سامنے آئے تھے۔