امریکہ کے جنگلات میں لگی آگ سے تباہی

آگ کے باعث اب تک 15 لاکھ ایکڑ رقبہ جل کر خاکستر ہو گیا ہے جب کہ کئی عمارتیں بھی منہدم ہو گئیں۔

کیلی فورنیا میں اس وقت موسم گرما اپنے عروج پر ہے اور کئی مقامات پر درجہ حرارت بڑھنے سے آگ کی شدت میں بھی اضافہ ہوا ہے۔

امدادی کارروائیوں کے دوران جانوروں کو آگ سے بچانے کے لیے بھی کوششیں کی جا رہی ہیں۔ ریسکیو اہلکار ایک گھوڑے کو محفوظ مقام پر منتقل کر رہے ہیں۔

 

ریاست کیلی فورنیا کے شہر سین ڈیاگو کے جنگلات میں لگی آگ بجھانے کے لیے امدادی کارکن کوشاں ہیں۔

کیلی فورنیا میں آگ سے نمٹنے کے محکمے کے مطابق اس وقت آگ بجھانے کے عملے کے 12 ہزار 500 اہلکار 22 مقامات پر بڑی آگ پر قابو پانے کی کوشش کر رہے ہیں۔

آگ کو بجھانے کے لیے جدید مشینری استعمال کی جا رہی ہے۔ آگ سے اب تک متعدد عمارتوں اور گاڑیوں کو نقصان پہنچا ہے۔

کیلی فورنیا کی ہمسایہ ریاست اوریگون میں بھی آگ بے قابو ہو گئی ہے۔ حکام کے مطابق آگ کی وجہ سے کئی قصبوں میں املاک کو نقصان پہنچا ہے۔

ریاست اوریگون میں 35 مختلف مقامات آگ کی لپیٹ میں ہیں۔ مجموعی طور پران مقامات کا رقبہ نیویارک سے دوگنا ہے۔
 

امریکہ کے مغربی علاقوں میں کئی مقامات پر جنگل کی آگ تیز ہواؤں کی وجہ سے پھیل رہی ہے۔

حکام کا کہنا ہے کہ آگ نے کیلی فورنیا اور اوریگون کے کئی علاقوں کو لپیٹ میں لے رکھا ہے۔