سندھ میں پرائمری اور مڈل اسکول بھی کھل گئے

کراچی سمیت سندھ بھر میں نویں تا بارھویں جماعت کے طلبہ کے لیے تعلیمی ادارے 15 ستمبر کو کھل گئے تھے۔ ان میں معمول کے مطابق تدریس جاری ہے۔

سندھ میں چھٹی سے آٹھویں جماعت تک کے تمام تعلیمی اداروں کو 21 ستمبر کو کھلنا تھا تاہم کرونا وائرس کے نئے کیسز سامنے آنے کے بعد اس میں ایک ہفتے کی توسیع کر دی گئی تھی تاہم پیر سے تعلیمی سلسلہ دوبارہ بحال ہو گیا ہے۔

محکمۂ تعلیم کی جانب سے تمام اسکولوں کے لیے احتیاطی تدابیر پر عمل کرنے کی ہدایات جاری کر دی گئی ہیں۔ ان میں ماسک پہننا بھی شامل ہے۔ جن اسکولوں میں احتیاطی تدابیر پر عمل نہیں ہو گا ان کے خلاف کارروائی کی جائے گی۔
 

بیمار طلبہ یا اساتذہ کو اسکول آنے سے منع کیا گیا ہے۔ اسکول آنے والے طلبہ کا جسمانی درجۂ حرارت بھی چیک کیا جاتا ہے۔ 

بین الاصوبائی وزرائے تعلیم کے اجلاس میں طے کیا گیا تھا کہ تعلیمی اداروں کو تین مرحلوں میں کھولا جائے گا۔ تاہم دوسرے مرحلے میں مڈل اسکولز جو 21 ستمبر سے کھلنا تھے انہیں سندھ میں ایک ہفتے کے لیے مؤخر کر دیا گیا تھا۔

صوبہ پنجاب اور خیبر پختونخوا میں پرائمری اسکولز 30 ستمبر کو کھولے جائیں گے جب کہ بلوچستان میں پرائمری اسکول کھولنے کا فیصلہ ابھی نہیں کیا گیا۔

کرونا وائرس کا پہلا کیس 26 فروری کو کراچی میں رپورٹ ہوا تھا جس کے کچھ عرصے بعد ہی تعلیمی ادارے بند کر دیے گئے تھے تاہم ستمبر سے تعلیمی سلسلہ دوبارہ بحال ہو گیا ہے۔

تعلیمی ادارے کھلنے کے بعد پیر کو کراچی کے ایک اسکول کا بیرونی منظر۔

پیر کو پرائمری اسکول کھلنے کے پہلے روز کلاسز اٹینڈ کرنے والے بچوں نے دن بھر فیس ماسک پہنے رکھا اور احتیاطی تدابیر پر عمل کیا۔

محکمہ تعلیم کی جانب سے جاری ایس او پیز کے تحت بچوں کے ساتھ تمام اساتذہ اور اسکول کے دیگر عملے کے لیے بھی ماسک پہننا لازمی ہے۔