تصاویر: پشاور یونیورسٹی کے نزدیک حملہ

پولیس حکام کے مطابق حملہ جمعے کی صبح جمرود روڈ پر واقع ڈائریکٹوریٹ زراعت خیبر پختونخوا پر کیا گیا جس کے احاطے میں ایگری کلچر ٹریننگ انسٹی ٹیوٹ بھی واقع ہے۔

پولیس حکام نے حملے میں 10 افراد کے ہلاک ہونے کی تصدیق کی ہے جن میں سے بیشتر ٹریننگ انسٹی ٹیوٹ کے طلبہ ہیں۔ تاہم عینی شاہدین نے وائس آف امریکہ کو بتایا ہے کہ حملے میں 11 افراد مارے گئے ہیں۔

حکام نے حملے میں کم از کم 34 افراد کے زخمی ہونے کی بھی تصدیق کی ہے۔

کالعدم شدت پسند تنظیم تحریکِ طالبان پاکستان نے صحافیوں کوبھیجے جانے والے ایک بیان میں حملے کی ذمہ داری قبول کرتے ہوئے دعویٰ کیا ہے کہ ان کے حملے کا نشانہ انٹیلی جنس ایجنسی 'آئی ایس آئی' کا خفیہ دفتر تھا۔

پشاور کے ایس ایس پی آپریشن سجاد خان نے تصدیق کی ہے کہ سکیورٹی فورسز کی جوابی کارروائی میں تینوں حملہ آور ہلاک ہوگئے ہیں۔

حملہ آوروں نے سب سے پہلے عمارت کے داخلی دروازے پر موجود چوکیدار کو نشانہ بنایا جس کے بعد وہ عمارت میں داخل ہوگئے۔

پولیس کا کہنا ہے کہ حملہ آور خود کُش جیکٹس اور بارودی مواد سے لیس تھے۔

حملہ آوروں کے خلاف آپریشن کے دوران عمارت میں موجود افراد کو ریسکیو کیا گیا۔