حکومت جاتے جاتے عوام کی مشکلات میں اضافہ کر رہی ہے: شیری رحمٰن
پاکستان پیپلزپارٹی کی سینیٹر شیری رحمٰن نے کہا ہے کہ حکومت جاتے جاتے بھی عوام کی مشکلات میں اضافہ کر رہی ہے۔
انہوں نے اپنے ایک ٹوئٹ میں کہا کہ حکومت کے پیدا کردہ بحران قوم کے لیے پریشانی کا باعث ہوں گے۔ ان کی بد انتظامیہ کی وجہ سے ملک میں مسلسل گیس کا بحران ہے۔
شیری رحمٰن نے حکومت پر تنقید کرتے ہوئے کہا کہ ''نااہل حکومت نا سردیوں میں گیس فراہم کرسکتی ہے نا ہی گرمیوں میں۔''
تمام فیصلوں کو میری حمایت حاصل ہے: چوہدری شجاعت
پاکستان مسلم لیگ (ق) کے سربراہ چوہدری شجاعت حسین نے ملک کی سیاسی صورتِ حال کے تناظر میں ان کے خاندان میں اختلافات کی خبروں کی تردید کردی ہے۔
چوہدری شجاعت نے اپنے ایک جاری بیان میں کہا ہے کہ ان کی سیاسی مشاورت سے تمام فیصلے ہوئے جنہیں ان کی مکمل حمایت حاصل ہے۔
ان کا کہنا تھا کہ کسی معاملے پر رائے کو فیصلہ سمجھ کر پراپیگنڈہ نہیں کرنا چاہیے۔
منحرف اراکین میں جرات ہے تو استعفیٰ دیں: عثمان ڈار
پاکستان تحریک انصاف (پی ٹی آئی) کے رہنما اور وزیراعظم کے معاون خصوصی عثمان ڈار نے اپنی ہی جماعت کے منحرف اراکین کو کہا ہے کہ اگر ان میں اخلاقی جرات ہے تو استعفیٰ دیں اور الیکشن لڑیں۔
انہوں نے ٹوئٹر پر اپنی ایک ویڈیو کلپ شیئر جس میں وہ ایک ٹی وی پروگرام میں بیٹھے منحرف پی ٹی آئی رکن باسط بخاری کو مخاطب کرتے ہوئے کہتے ہیں کہ ''جس ووٹ سے اسمبلی میں آئے ہیں وہ عمران خان کے نام پر ملا ہے۔ ضمیر کے نام پر ڈرامہ بند کریں۔''
عثمان ڈار کا کہنا تھا کہ ''آپ میں اخلاقی جرات ہے تو استعفیٰ دے کر الیکشن لڑیں، عوام وہ حشر کرے گی کہ آپ یاد کریں گے۔''
اپوزیشن 172 ووٹ پورے نہیں کرسکے گی: شیخ رشید
وفاقی وزیرِ داخلہ شیخ رشید احمد نے دعویٰ کیا ہے کہ اپوزیشن وزیراعظم عمران خان کے خلاف تحریک عدم اعتماد کے لیے 172 ووٹ پورے نہیں کرسکے گی اور اتحادی واپس آ جائیں گے۔
پاکستان کے نجی ٹی وی چینل 'جیو نیوز' کو دیے گئے انٹرویو میں انہوں نے کہا کہ تین اپریل کو عدم اعتماد پر ووٹنگ پر عمران خان جیتیں گے۔
اتحادیوں سے متعلق سوال پر انہوں نے کہا کہ ایم کیو ایم والے سمجھ دار لوگ ہیں وہ تیار ہو جائیں گے۔ شیخ رشید احمد کا کہنا تھا کہ صورتِ حال یہ ہے کہ ملک قبل از وقت انتخابات کی طرف جا رہا ہے۔