وزیرِاعظم عمران خان کا قوم سے خطاب مؤخر
وزیرِاعظم عمران خان کا قوم سے خطاب مؤخر کر دیا گیا ہے۔ تحریکِ انصاف کے رہنما سینیٹر فیصل جاوید نے ٹوئٹ کے ذریعے آگاہ کیا کہ وزیرِاعظم عمران خان کا آج قوم سے خطاب مؤخر ہو گیا ہے۔
اس سے قبل پاکستان تحریکِ انصاف کے رہنما فیصل جاوید کا کہنا تھا کہ وزیرِاعظم عمران خان آج شام قوم سے خطاب کریں گے۔ ان کا کہنا تھا کہ وزیراعظم عمران خان اپنی قوم کے لیے ڈٹ کر کھڑے ہیں۔
البتہ شام ساڑھے پانچ بجے کے قریب فیصل جاوید نے ایک بار پھر ٹوئٹ کیا جس میں انہوں نے وزیرِاعظم کا خطاب مؤخر ہونے کا اعلان کیا۔
ایم کیو ایم کا اپوزیشن کی حمایت کا اعلان
متحدہ قومی موومنٹ پاکستان کے سربراہ خالد مقبول صدیقی نے کہا ہے کہ اپوزیشن کے ساتھ ورکنگ ریلیشن قائم کی ہے جس میں کوئی ذاتی فائدہ نہیں۔ ان کے بقول حزبِ اختلاف کے ساتھ ہونے والے معاہدے کی ایک ایک شق عوام کے مفاد سے متعلق ہے۔
اپوزیشن رہنماؤں کے ہمراہ پریس کانفرنس کے دوران خالد مقبول صدیقی نے کہا کہ اللہ تعالی ہمیں سرخرو کرے، ہم نے اپنے تمام سیاسی مفادات پر پاکستان کے مفادات کو ترجیح دی ہے۔
انہوں نے کہا کہ عوام کو ریلیف پہنچانے کے لیے اپوزیشن کے ساتھ شریک سفر ہوئے۔ آج کے دن ایسے دور کا آغاز کریں جہاں سیاسی فیصلوں کو انتقام نہ سمجھا جائے۔
متحدہ اپوزیشن کے رہنماؤں نے وزیرِ اعظم عمران خان سے فوری طور پر مستعفی ہونے کا بھی مطالبہ کیا۔
موجودہ سیاسی منظرِ نامے پر مریم نواز کا ٹوئٹ
علیم خان گروپ کا وزیر اعلیٰ پنجاب کے امیدوار چوہدری پرویز الہیٰ کو ووٹ دینے سے انکار
پنجاب اسمبلی میں تحریک انصاف کے منحرف رہنما علیم خان کے گروپ نے وزیرِ اعلیٰ کے لیے نامزد امیدوار چوہدری پرویز الہیٰ کو ووٹ دینے سے انکار کر دیا ہے۔
علیم خان گروپ کے ترجمان میاں خالد محمود نے ایک بیان میں کہا ہے کہ ان کا گروپ مسلم لیگ (ق) کے وزیرِ اعلیٰ کو ووٹ نہیں دے گا۔ ان کے بقول پارٹی قائد عمران خان جن القابات سے پرویز الہیٰ کو ماضی میں بلاتے تھے، وہ انہیں دہرانے کی جسارت بھی نہیں کر سکتے۔
ترجمان نے دعویٰ کیا کہ تحریک انصاف کے ہر مخلص کارکن کو پرویز الہیٰ کی نامزدگی پر اعتراض ہے۔
خیال رہے کہ علیم خان گروپ کے ارکان کی حقیقی تعداد اب تک سامنے نہیں آئی۔ البتہ وہ خود کو ایک بڑے گروپ کے طور پر ظاہر کرتے ہیں۔