رسائی کے لنکس

logo-print

اتحادی افواج کے اڈے کے باہر کار بم دھماکا


فائل فوتو

افغان پولیس کا کہنا ہے کہ بدھ کے روز جنوبی شہر قندھار میں قائم اتحادی افواج کے ایک چھوٹے اڈے کے باہر کار بم دھماکا ہوا ہے جس میں کم از کم دو افراد زخمی ہو گئے ہیں۔

دھماکا کیمپ نیتھن سمتھ کی پارکنگ میں ہوا جہاں اڈے پر آنے والے مقامی افغان اپنی گاڑیاں کھڑی کرتے ہیں۔ حکام کے مطابق اس اڈے میں افغانستان میں ترقیاتی منصوبوں پر کام کرنے والے امریکی اور کینیڈین حکومتی ملازمین کام کرتے ہیں جب کہ یہاں بیسیوں کینیڈین فوجی اور امریکی فوجی پولیس بھی تعینات ہیں۔

تاحال کسی گروپ نے کار بم حملے کی ذمہ داری قبول نہیں کی ہے لیکن حالیہ دنوں میں طالبان جنگجوؤں نے افغان دارالحکومت کابل اور ملک کے جنوبی علاقوں میں اتحادی افواج اور حکومتی اہداف پر متعدد حملے کیے ہیں۔

گذشتہ ہفتے کابل کی ایک مصروف شاہراہ پر اتحادی افواج کے قافلے پر کیے گئے خودکش کار بم حملے میں چھ غیر ملکی فوجیوں سمیت کم از کم 18 افراد ہلاک ہو گئے تھے۔

XS
SM
MD
LG