افغان حکام کا کہنا ہے کہ اتحادی افواج کی مدد سے جنوبی افغانستان میں کی گئی ایک مشترکہ کارروائی میں 18 شدت پسندوں کو ہلاک کر دیاگیا ہے۔
وزارتِ داخلہ کی جانب سے جاری کیے گئے ایک بیان میں کہا گیا ہے کہ صوبہ ہلمندکے علاقے سنگین میں پیر کے روز کی گئی اِس کارروائی میں چھ عسکریت پسندوں کو گرفتار بھی کیا گیا جب کہ لڑائی میں سکیورٹی فورسز کا کوئی جانی نقصان نہیں ہوا۔
گذشتہ سال سے امریکی اور اتحادی افواج نے اپنی توجہ مشرقی اور جنوبی افغانستان میں طالبان جنگجوؤں کے زیرِ اثر علاقوں پر مرکوز کی ہوئی ہے اور غیر ملکی فوجی عہدیداران کا کہنا ہے کہ آنے والے دنوں میں مزید امریکی فوجیوں کی آمد کے بعد طالبان کے خلاف جاری جنگ میں تیزی آئے گی۔
