کرونا وائرس: پاکستانی سیاستدانوں کا ہیلتھ ایمرجنسی کے نفاذ کا مطالبہ
پاکستان کے سینیٹ کی خارجہ امور کمیٹی نے کرونا وائرس کے خطرات کے پیش نظر ملک میں فوری پبلک ہیلتھ ایمرجنسی لگانے کی قرارداد منظور کی ہے۔ جس میں حکومت پر زور دیا گیا ہے کہ عالمی ادارہ صحت کی جانب سے عالمی وبا قرار دیے جانے کے بعد ہنگامی اقدامات کیے جائیں۔
سینیٹ کمیٹی نے وزیر اعظم کی سربراہی میں نیشنل ایمرجنسی کرونا وائرس ٹاسک فورس قائم کرنے کی شفارش کی ہے جو کہ صوبوں کے وزرائے اعلٰی اور دیگر شراکت داروں پر مشتمل ہو۔
سینیٹ کمیٹی کی منظور کردہ قرارداد کے متن کے مطابق کرونا وائرس کے باعث ہماری سماجی زندگی، معیشت، تعلیمی و کھیلوں کی سرگرمیاں متاثر ہو سکتی ہیں۔
سینیٹ کی خارجہ امور کمیٹی کے چیئرمین مشاہد حسین سید نے وائس آف امریکہ سے بات کرتے ہوئے کہا کہ اب جب کہ عالمی ادارہ صحت نے کرونا کو عالمی وبا قرار دے دیا ہے۔ تو پاکستان کو اس سے نمٹنے کے لیے تجویز کردہ تمام اقدامات اٹھانے چاہئیں۔
انہوں نے کہا کہ کرونا وائرس اب ایک سفارتی مسئلہ بھی بن گیا ہے اور اس حوالے سے سفارت کاری میں پاکستان کا کردار ہونا چاہیے۔ کیوں کہ چین اور ایران ہمارے ہمسایہ ملک ہیں۔
سینیٹر رحمن ملک نے کہا کہ کرونا وائرس قومی سلامتی کا مسئلہ بن گیا ہے۔ لہذٰا وفاقی حکومت وائرس سے نمٹنے کے لیے نیشنل ایکشن پلان بنائے۔
رحمان ملک کا کہنا تھا کہ اس ماہ کے آخر تک پارلیمنٹ کے اجلاس سمیت پاکستان سپر لیگ کے مقابلے بھی منسوخ کیے جائیں۔
کرونا وائرس سے عالمی معیشت کو اربوں ڈالر کا نقصان، ہر شعبہ متاثر
چین کے شہر ووہان سے پھیلنے والا کرونا وائرس لگ بھگ دُنیا کے 113 ممالک میں سرایت کر چکا ہے جس کے باعث عالمی معیشت، تجارت، کھیل سمیت زندگی کا ہر شعبہ بری طرح متاثر ہو رہا ہے۔ عالمی ادارہ صحت (ڈبلیو ایچ او) نے اسے وبائی مرض بھی قرار دے دیا ہے۔
امریکہ، بھارت، ایران، پاکستان، یورپ سمیت دُنیا کے بیشتر ممالک نے سرکاری مشینری اس وبائی مرض کا پھیلاؤ روکنے کے لیے وقف کر رکھی ہے۔
پاکستان میں کرونا وائرس کا پھیلاؤ روکنے کے لیے 'صحت ایمرجنسی' نافذ کرنے کے مطالبات کیے جا رہے ہیں۔
اٹلی میں لاک ڈاؤن کے بعد ڈنمارک اور دیگر یورپی ملکوں میں بھی احتیاطی تدابیر اختیار کی جا رہی ہیں۔
کرونا وائرس کے باعث اب تک دُنیا بھر میں 4600 افراد ہلاک جب کہ ایک لاکھ 26 ہزار افراد اس وائرس کا شکار ہو چکے ہیں۔
امریکی اداکار ٹام ہینکس اور اُن کی اہلیہ کرونا وائرس کے شکار
کرونا وائرس نے اسکر ایوارڈ یافتہ امریکی اداکار ٹام ہینکس اور ان کی اہلیہ ریٹا ولسن کو بھی اپنی لپیٹ میں لے لیا ہے۔
اس حوالے سے ٹام ہینکس نے اپنے انسٹاگرام اکاؤنٹ پر ایک پوسٹ بھی شیئر کی ہے جس میں انہوں نے تصدیق کی کہ وہ اور اُن کی اہلیہ کرونا وائرس کے شکار ہو گئے ہیں۔
ٹام ہینکس اور ریٹا ولسن ایک فلم کی شوٹنگ کے سلسلے میں آسٹریلیا کے دورے پر ہیں جہاں اُن کے کرونا وائرس کے ٹیسٹ مثبت آئے ہیں۔
بھارت کی ویزا پابندی: آئی پی ایل میں غیر ملکی کھلاڑیوں کی شرکت مشکوک
کرونا وائرس کے سبب بھارت کی حکومت نے ایک ماہ کے لیے ویزا پر پابندی عائد کر دی ہے جس کے بعد انڈین پریمیئر لیگ (آئی پی ایل) میں غیر ملکی کھلاڑیوں کی شرکت مشکوک ہو گئی ہے۔
بھارت کے خبر رساں ادارے پریس ٹرسٹ آف انڈیا (پی ٹی آئی) نے بورڈ آف کنٹرول فار کرکٹ ان انڈیا (بی سی سی آئی) کے ایک عہدیدار کے حوالے سے رپورٹ کیا ہے کہ حکومت نے 15 اپریل تک غیر ملکیوں کے لیے ویزا اجرا پر پابندی عائد کی ہے جس کی وجہ سے غیر ملکی کھلاڑی آئی پی ایل میں شریک نہیں ہو سکیں گے۔
واضح رہے کہ آئی پی ایل کا رواں سیزین 29 مارچ سے شروع ہو رہا ہے جس کا اختتام 24 مئی کو ہو گا۔
