ازبکستان میں بھی کرونا وائرس کا پہلا کیس رپورٹ
ازبکستان کی وزاتِ صحت نے کہا ہے کہ اتوار کو ملک میں کرونا وائرس کا پہلا کیس رپورٹ ہوا ہے۔ متاثرہ فرد ازبکستان کا شہری ہے جس نے حال ہی میں فرانس کا سفر کیا تھا۔
خبر رساں ادارے 'رائٹرز' کے مطابق ازبکستان تین کروڑ 40 لاکھ کے لگ بھگ آبادی والا ملک ہے۔ مقامی وزارتِ صحت کے مطابق حکام ملک میں کرونا وائرس کا پھیلاؤ روکنے کے لیے تمام ضروری اقدامات کر رہے ہیں۔
ازبکستان کی سرکاری ایئرلائن کا کہنا ہے کہ وہ یورپی شہروں، ایشیا اور مشرقِ وسطیٰ جانے والی اپنی کچھ فلائٹس کو یا تو معطل کر رہے ہیں یا ان پر پابندی عائد کر رہے ہیں جو اپریل تک نافذ رہے گی۔
تفتان کے قرنطینہ مرکز میں مقیم پاکستانی پریشان
کرونا وائرس کا پھیلاؤ روکنے کے لیے ایران سے پاکستان آنے والے زائرین کو تفتان کے قرنطینہ مرکز میں رکھا جا رہا ہے۔ لیکن شہری وہاں عدم سہولیات کا شکوہ کر رہے ہیں۔ قرنطینہ مرکز میں لوگوں کو کیا مشکلات درپیش ہیں؟ جانتے ہیں وہاں مقیم ایک پاکستانی کی زبانی۔
کرونا وائرس پر کنٹرول کے لیے سرحدیں بند کرنے کو اولیت دی جا رہی ہے
کرونا وائرس کے پھیلاؤ کو روکنے کے لیے دنیا بھر کے ملکوں نے ہفتے کے روز اپنی سرحدیں بند کر دیں۔ ملک میں داخلے پر سخت بندشیں عائد رہیں، قرنطینہ کی لازمی شرط پر عمل کیا جاتا رہا اور بڑے اجتماعات پر پابندی جاری رہی۔
رائٹرز کی تفصیلی رپورٹ میں بتایا گیا ہے کہ 27 مارچ تک چین سے باہر کی دنیا میں ایپل کے اسٹوروں کا کاروبار بند رہے گا۔ ادھر چین میں جمعے کے روز سے تمام 42 اسٹور کھول دیے گئے۔ یہ ایک ایسے موقع پر ہوا ہے جب چین کی سر زمین پر ڈرامائی طور پر وائرس کے پھیلاؤ میں قدرے کمی نظر آ رہی ہے۔
چونکہ دنیا بھر میں 5000 سے زائد افراد ہلاک ہو چکے ہیں اور لگ بھگ ڈیڑھ لاکھ افراد اس وائرس سے متاثر ہیں۔ تمام ملکوں نے عجائب خانے بند کر دیے ہیں۔ سیاحتی کشش والے مقامات اور تقریبات کا انعقاد روک دیا گیا ہے، تاکہ کرونا وائرس پھیلنے کا اندیشہ کم سے کم ہو۔
کولمبیا نے بتایا ہے کہ وہ ونزویلا کے ساتھ اپنی سرحدیں بند کر دے گا اور یورپ یا ایشیا سے واپس آنے والے سیاحوں کو روک دے گا، جب کہ جمعے کی شب سے یورپ سے امریکہ آنے والے زیادہ تر افراد کا داخلہ بند کر دیا گیا ہے۔
کرونا وائرس: فلم فروزن ٹو جلد ریلز کرنے کا فیصلہ
والٹ ڈزنی کمپنی نے اپنی نئی اینی میٹڈ فلم فروزن ٹو مقررہ وقت سے کئی مہینے پہلے ریلز کرنے کا فیصلہ کیا ہے تاکہ ان خاندانوں کو جنہیں کرونا وائرس کے باعث اپنا زیادہ تر وقت گھر میں گزارنا پڑ رہا ہے، اس فلم کا لطف اٹھا سکیں۔ کمپنی کا خیال ہے کہ لوگوں کے بڑے پیمانے پر گھر موجود ہونے سے اسے کہیں زیادہ ناظرین مل سکیں گے۔
ڈزنی اپنی یہ نئی فلم ڈزنی پلس چینل پر سٹریم کرے گا۔
جمعے کے روز ڈزنی کے ایک اعلان میں کہا گیا ہے کہ فلم 'فروزن ٹو' کی سٹریمنگ ڈزنی پلس پر اتوار سے شروع کی جا رہی ہے، جب کہ معمول کے حالات میں یہ تین مہینے بعد ریلز کی جانی تھی۔
کینیڈا، آسٹریلیا، نیوزی لینڈ اور نیدرلینڈز میں فیروزن ٹو کی سٹریمنگ منگل سے شروع کی جا رہی ہے۔
کرونا وائرس کی وجہ سے ڈزنی سمیت کئی کمپنیوں نے اپنی نئی فلموں کی ریلز ملتوی کر دی ہے۔ ان میں سے کچھ فلمیں مارچ اور اپریل میں ریلز ہونا تھیں مگر کچھ تھیٹرز بند کر دیے گئے ہیں، کیونکہ صحت سے متعلق حکام نے ہدایات جاری کی ہیں کہ وائرس کے خطرے کے پیش نظر اجتماع سے گریز کیا جائے۔
فلم کمپنیاں اپنی نئی فلمیں پہلے سینما گھروں میں ریلز کرتی ہیں جس کے بعد انہیں سٹریمنگ پر ڈال دیا جاتا ہے۔
