عمران خان کی زیرِ صدارت نیشنل کوآرڈینیشن کمیٹی کا اجلاس
کرونا وائرس کے باعث ملک کو درپیش چیلنجز سے نمٹنے کا جائزہ لینے کے لیے پاکستان کے وزیرِ اعظم عمران خان کی زیرِ صدارت نیشنل کوآرڈینیشن کمیٹی کا اجلاس ہوا۔
اجلاس میں وفاقی وزرا، معاونین اور عسکری نمائندے موجود تھے جب کہ تمام صوبوں کے وزرائے اعلیٰ بذریعہ ویڈیو لنک اجلاس میں شریک ہوئے۔
لاہور کا شاہی قلعہ سیاحوں کے لیے بند
لاہور کے تاریخی شاہی قلعے کو بھی کرونا وائرس کے خدشے پیشِ نظر بند کر دیا گیا ہے۔ قلعہ انتظامیہ نے پنجاب حکومت کے احکامات کی روشنی میں قلعے کو سیاحوں کے لیے بند کیا۔ لاہور کے شاہی قلعے میں روزانہ سیکڑوں سیاحوں سیر کے لیے آتے ہیں۔
سندھ میں نئے تعلیمی سال کا اعلان
وزیر تعلیم سندھ سعید غنی نے پیر کو کراچی میں پریس کانفرنس کے دوران اعلان کیا کہ پہلی سے آٹھویں جماعت کے طلبہ کو اگلی کلاسز میں پروموٹ کر دیا جائے گا۔
اُن کے بقول، اسٹیرنگ کمیٹی کے اجلاس کے دوران فیصلہ کیا گیا ہے کہ اسکولوں کے لیے نئے تعلیمی سال کا آغاز جون 2020 سے ہو گا۔ نویں اور دسویں جماعت کے امتحانات 15 جون سے ہوں گے اور دسویں جماعت کے نتائج کا اعلان 15 اگست کو کیا جائے گا۔
وزیرِ تعلیم سندھ نے مزید کہا کہ نویں جماعت کی مارک شیٹ کی بنیاد پر گیارہویں جماعت میں داخلہ دیا جائے گا۔
سعید غنی کے مطابق گیارہویں اور بارہویں جماعت کے امتحانات چھ جولائی سے ہوں گے۔ یکم اگست سے گیارہویں اور بارہویں جماعت کی کلاسز شروع ہوں گی۔
وزیرِ تعلیم سندھ سعید غنی کے مطابق والدین کو ماہانہ فیس ادا کرنا ہو گی لیکن کوئی اسکول اضافی فیس لینے کا مجاز نہیں ہو گا۔
پاکستان اور بنگلہ دیش کے درمیان ون ڈے اور ٹیسٹ میچ ملتوی
پاکستان کرکٹ بورڈ (پی سی بی) کے مطابق بنگلہ دیش کے خلاف سیریز کے تیسرے مرحلے کے لیے کراچی میں کھیلا جانے والا ایک روزہ میچ اور ایک ٹیسٹ میچ ملتوی کر دیا گیا ہے۔
بنگلہ دیش کرکٹ ٹیم کو سیریز کے تیسرے مرحلے کے لیے 29 مارچ کو کراچی پہنچنا تھا جہاں دونوں ٹیموں کے درمیان یکم اپریل کو ون ڈے اور پانچ سے نو اپریل کے درمیان ٹیسٹ میچ کھیلا جانا تھا۔
پی سی بی کے مطابق دونوں کرکٹ بورڈز آئی سی سی ٹیسٹ چیمپئن شپ کے لیے سیریز مکمل کرنے کے لیے رابطے میں ہیں۔
یاد رہے کہ پاکستان اور بنگلہ دیش کے درمیان دو ٹیسٹ میچز پر مشتمل سیریز کا پہلا میچ سات سے 10 فروری تک راولپنڈی میں کھیلا گیا تھا۔
پاکستان کرکٹ بورڈ نے پاکستان کپ ون ڈے ٹورنامنٹ بھی ملتوی کر دیا ہے جس کا آغاز 25 مارچ سے ہونا تھا۔