کرونا وائرس: سندھ میں شاپنگ مالز، ریستوران اور سرکاری دفاتر بند کرنے کا فیصلہ
کرونا وائرس کے پیشِ نظر سندھ حکومت نے صوبے بھر میں تمام ریستورانوں اور شاپنگ مالز کو 15 روز کے لیے بند کرنے کا فیصلہ کیا ہے۔
وزیر اعلیٰ سندھ مراد علی شاہ نے کہا ہے کہ پابندی کا اطلاق بدھ سے ہو گا۔ البتہ کریانہ اسٹورز، سبزی اور مرغی کی دکانیں کھلی رہیں گی۔ ریستورانوں سے کھانا آرڈر کیا جا سکتا ہے لیکن ڈائننگ پر پابندی ہو گی۔
سندھ حکومت نے سرکاری دفاتر کو بھی جمعرات سے بند کرنے کا فیصلہ کیا ہے جب کہ انٹرسٹی بسیں، ساحل سمندر اور پارکس وغیرہ بھی بند رہیں گے۔
وزیرِ اعلیٰ سندھ نے کہا ہے کہ لوگوں کو گھروں میں محدود کرنا چاہتے ہیں۔ اگر وائرس پھیل گیا تو اسپتال پورے نہیں پڑیں گے۔
کرونا وائرس: امریکی ریاست اوہائیو میں پرائمری انتخاب ملتوی
امریکہ کی ریاست اوہائیو میں ڈیموکریٹ جماعت کے صدارتی امیدوار کے انتخاب کے لیے ہونے والے پرائمری الیکشن انعقاد سے چند گھنٹوں قبل منسوخ کر دیے گئے ہیں۔
اوہائیو کے گورنر نے کہا ہے کہ کرونا وائرس کو مزید پھیلنے سے روکنے کے لیے یہ اقدام بہت ضروری تھا۔ اوہائیو کے سیکریٹری آف اسٹیٹ فرینک لاروز کا کہنا تھا کہ پرائمری انتخابات جون تک کے لیے ملتوی کیے گئے ہیں۔
خیال رہے کہ منگل کو اوہائیو سمیت چار امریکی ریاستوں میں پرائمری انتخابات ہونا تھے۔ البتہ اب اوہائیو کے علاوہ باقی تین ریاستوں فلوریڈا، ایریزونا اور الی نوائے میں پرائمری انتخابات شیڈول کے مطابق ہوں گے۔
فلوریڈا کے گورنر نے کہا ہے کہ گھبرانے کی کوئی ضرورت نہیں۔ زیادہ تر لوگ پولنگ اسٹیشن میں صرف چند منٹوں کے لیے ہی جائیں گے۔ واضح رہے کہ فلوریڈا میں کرونا وائرس کے 142 کیسز رپورٹ ہو چکے ہیں۔
کرونا وائرس کے پیشِ نظر اب تک امریکہ کی چار ریاستوں میں پرائمری انتخابات ملتوی ہو چکے ہیں۔ اوہائیو کے علاوہ جارجیا، کینٹکی اور لوزیانا میں بھی پرائمریز ملتوی کیے گئے ہیں۔
پاکستان میں کرونا وائرس سے بچاؤ کی تدابیر
پاکستان میں کرونا وائرس کا پھیلاؤ روکنے کے لیے حکومت کی جانب سے مختلف حفاظتی اقدامات کیے جا رہے ہیں۔ ملک کے چاروں صوبوں کی حکومتیں کرونا وائرس کا پھیلاؤ روکنے کے لیے سرگرم ہیں۔ اسلام آباد کے بین الاقوامی ہوائی اڈے پر بھی جراثیم کش اسپرے کیا گیا۔
کرونا وائرس: ہالی وڈ کے وہ ستارے جو خود ساختہ تنہائی میں ہیں
امریکی گلوکاروں اور فن کاروں نے کرونا وائرس کے پھیلاؤ کے سبب تنہائی اختیار کرلی ہے اور خود کو گھروں تک محدود کر لیا ہے۔
ہالی وڈ ستاروں نے اپنے پرستاروں کو بھی گھروں تک محدود رہنے اور لوگوں سے فاصلہ رکھنے کا مشورہ دیا ہے۔
خبر رساں ادارے 'رائٹرز' کے مطابق ٹرمینیٹر اسٹار اور کیلیفورنیا کے سابق گورنر آرنلڈ شیوازنگر نے سوشل میڈیا پر اپنے پیغام میں کہا ہے کہ امریکی شہری دوسروں کی غلطیوں سے سیکھیں۔
انہوں نے اپنی مثال دیتے ہوئے کہا کہ وہ ان دنوں بالکل بھی گھر سے باہر نہیں نکلتے۔ باہر کھانا کھانے بھی نہیں جاتے اور ایسا کچھ کرنا نہیں چاہتے جس سے کسی الجھن میں مبتلا ہوں۔
انہوں نے پرستاروں کو مشورہ دیتے ہوئے کہا کہ وہ بھی گھر میں رہیں، ماہرین کے خیالات سنیں اور احتیاطی تدابیر اختیار کریں۔