کرونا وائرس نے بے گھر افراد کی بھوک میں بھی اضافہ کر دیا
ایک ایسے وقت میں جب واشنگٹن ڈی سی کے ریسٹورینٹس اور بیکریز، کرونا وائرس کی وجہ سے گاہکوں کے لئے بند ہیں، ایک حلال ریستوران بدستور کھلا ہوا ہے۔ اپنے ان گاہکوں کے لئے جن کا کوئی گھر نہیں ہے اور نہ ہی کھانے پینے کا کوئی وسیلہ ہے۔ یہ ریستوران انہیں مفت کھانا فراہم کرتا ہے 'بلا امتیاز مذہب اور رنگ و نسل'۔
یہ بات سہیل قاضی نے بتائی جو منگل کی شام کو کھانوں کے ڈبے لے کر ایک قریبی پارک میں گئے تھے، تاکہ وہاں رہنے والے ان درجنوں بے گھر افراد کا پیٹ بھر سکیں جن کے پاس کوئی اور وسیلہ نہیں ہے۔
انھوں نے بتایا کہ ویسے تو ان کا ریستوراں دو ہزار تیرہ سے ہزاروں کھانے تقسیم کر چکا ہے لیکن اس وقت ایسا کرنا اس لئے ضروری ہے کیونکہ جیسا کسی بھی بڑی آفت یا وبا کے وقت ہوتا ہے کہ ہر ایک کو اپنی اپنی پڑ جاتی ہے۔ اب ان میں سے بہت سوں کو نہیں پتہ کہ انہیں کہاں سے کھانا مل سکتا ہے۔ اسی لئے میں خود یہاں آ یا ہوں۔
منان قاضی اور ان کے چھوٹے بھائی سہیل قاضی جانتے ہیں کہ بھوک کیا ہوتی ہے، کیونکہ ان کا تعلق پاکستان کے شہر جہلم کے ایک ایسے مفلس گھرانے سے ہے جس میں نو بہن بھائی تھے۔ گزارہ مشکل سے ہوتا تھا۔ جب ان کی زندگی میں آسودگی آئی تو وہ اسے اللہ کا انعام سمجھ کر دوسرے انسانوں کو بھی شریک کرنا چاہتے ہیں۔
کرونا وائرس: ایران سے افغان پناہ گزینوں کی وطن واپسی
ایران میں کرونا وائرس کے ہزاروں کیسز اور ہلاکتوں کی وجہ سے خوف کی فضا قائم ہے۔ ایران میں مقیم افغان پناہ گزین بھی وطن واپس جانا شروع ہو گئے ہیں۔ اقوام متحدہ کے مطابق تین ماہ میں تقریباً 83 ہزار افغان پناہ گزین ایران سے افغانستان جا چکے ہیں۔
بھارت میں کرونا وائرس کے مزید 27 مریض، ایران میں 255 بھارتی 'کووڈ 19' میں مبتلا
بھارت کی 11 مختلف ریاستوں میں کرونا وائرس کے مزید 27 کیسز سامنے آنے کے بعد ملک بھر میں 'کووڈ 19' کے مریضوں کی تعداد 169 ہو گئی ہے جب کہ تین افراد اس مرض سے ہلاک ہو چکے ہیں۔
رپورٹ کیے گئے 169 افراد میں سے 25 غیر ملکی ہیں۔
وائرس سے متاثرہ خلیجی ملکوں مثلاً متحدہ عرب امارات، کویت، قطر اور عمان سے 19 سے 31 مارچ کے دوران 26 ہزار بھارتی باشندوں کی ممبئی آمد متوقع ہے۔ ان تمام لوگوں کو 14 دنوں تک قرنطینہ مراکز میں رکھا جائے گا۔
بھارتی وزارت خارجہ کے مطابق ایران میں 255 بھارتی باشندوں میں کرونا وائرس کی تشخیص ہوئی ہے۔ بھارتی وزیرِ اعظم نریندر مودی جمعرات کو کرونا وائرس کے موضوع پر عوام سے خطاب کریں گے۔
چین میں پہلی مرتبہ کرونا وائرس کا یومیہ کوئی نیا کیس رپورٹ نہیں ہوا
چین میں جمعرات کو پہلی مرتبہ کرونا وائرس کا کوئی کیس رپورٹ نہیں ہوا۔ گزشتہ برس دسمبر میں کرونا وائرس کے کیسز سامنے آنے کے بعد سے یہ پہلا موقع ہے کہ ایک روز کے دوران کوئی نیا کیس سامنے نہیں آیا ہے۔
چین کے نیشنل ہیلتھ کمیشن کے مطابق ووہان سے گزشتہ سال اس وائرس کی وبا عام ہوئی تھی وہاں بھی کوئی نیا کیس سامنے نہیں آیا۔ چین میں جنوری سے روزانہ کی بنیاد پر سیکڑوں نئے کیسز سامنے آ رہے تھے جس میں بتدریج کمی واقع ہو رہی تھی۔
وسطی چین کے شہر ووہان کی ایک کروڑ سے زائد آبادی اور صوبہ ہوبے کے دیگر شہروں میں رہنے والے چار کروڑ افراد 23 جنوری سے سخت حالات کا سامنا کر رہے تھے۔ جہاں پورا صوبہ مکمل طور پر لاک ڈاؤن تھا۔
چینی حکومت نے اب بھی ملک بھر میں عوامی اجتماعت کو محدود سے محدود تر کرنے کے لیے سخت اقدامات کیے ہوئے ہیں۔
نیشنل ہیلتھ کمیشن کے مطابق ملک بھر میں 81 ہزار افراد کا کرونا ٹیسٹ مثبت آیا تھا جن میں سے 7245 افراد تاحال زیرِ علاج ہیں۔
کرونا وائرس سے عالمی سطح پر متاثرین کی تعداد 2 لاکھ سے تجاوز کر گئی ہے جب کہ 8263 افراد لقمہ اجل بن چکے ہیں۔