کرونا وائرس سے بچاؤ کیسے ممکن ہے؟
کرونا سے امریکہ میں 200 ہلاکتیں، کیلی فورنیا کے شہریوں کے گھروں سے نکلنے پر پابندی
امریکہ کی ریاست کیلی فورنیا کے گورنر نے شہریوں کو حکم دیا ہے کہ وہ کرونا وائرس کے پھیلاؤ کے پیشِ نظر اپنے گھروں تک ہی محدود رہیں اور غیر ضروری طور پر باہر نہ نکلیں۔
امریکہ میں کرونا وائرس کے مزید 2700 نئے کیسز سامنے آنے کے بعد اس مہلک وبا سے متاثرہ افراد کی مجموعی تعداد 13 ہزار 133 تک پہنچ گئی ہے جب کہ لگ بھگ 200 افراد ہلاک ہو چکے ہیں۔
امریکہ کی تمام 50 ریاستیں کرونا وائرس کی لپیٹ میں ہیں اور مختلف ریاستوں میں عوامی اجتماعات اور عوامی مقامات بند ہیں اور لوگوں کو گھروں میں ہی رہنے کی ہدایات دی گئی ہیں۔
لنڈی کوتل میں عمرہ زائرین کے گھروں سے نکلنے پر پابندی
خیبر پختونخوا میں کرونا وائرس سے بچاؤ کے لیے لنڈی کوتل کے 94 عمرہ زائرین کے گھروں سے نکلنے پر پابندی عائد کر دی گئی ہے۔
ضلعی انتظامیہ نے پشاور سے ملحقہ قبائلی ضلع خیبر کے علاقے لنڈی کوتل سے تعلق رکھنے والے عمرہ زائرین کو دو ہفتوں تک گھروں سے نہ نکلنے کی ہدایت کی ہے۔
لنڈی کوتل کے ایڈیشنل اسسٹنٹ کمشنر شمس الاسلام کے جاری کردہ اعلامیے کے مطابق گزشتہ کچھ روز کے دوران عمرہ ادا کر کے اپنے علاقوں میں لوٹنے والے 94 زائرین اپنے گھروں میں رہیں گے۔
ایڈیشنل اسسٹنٹ کمشنر شمس الاسلام نے کہا ہے کہ یہ اقدام کرونا وائرس کی روک تمام کے لیے کیا گیا ہے جب کہ مزید اقدامات بھی کیے جا رہے ہیں۔
کرونا وائرس کے مریضوں کے لیے کراچی ایکسپو سینٹر میں عارضی اسپتال قائم
کراچی میں کرونا وائرس کے بڑھتے خطرات کے پیش نظر ایکسپو سینٹر میں ایک بڑا عارضی اسپتال قائم کرنے کے اقدامات شروع کر دیے گئے ہیں۔
صوبائی حکومت نے اس بات کا فیصلہ مریضوں کی مسلسل بڑھتی ہوئی تعداد کے باعث کیا تھا۔ اس مقصد کے لیے فوج کی خدمات بھی حاصل کی گئی ہیں۔
جمعے کو اعلیٰ سول و عسکری حکام نے ایکسپو سینٹر کا دورہ کر کے وہاں عارضی اسپتال کے انتظامات کا جائزہ لیا۔
عارضی اسپتال میں آرمی کی جانب سے آئسولیشن سینٹر بھی قائم کیا جا رہا ہے جس میں وینٹی لیٹرز اور دیگر طبی سہولیات بھی فراہم کی جائیں گی۔ اسی طرح کراچی ایئرپورٹ کے قریب ایک سرکاری ہوٹل میں بھی 30 بیڈ کا قرنطینہ سینٹر قائم کیا گیا ہے۔
یاد رہے کہ سندھ پاکستان میں اب تک کرونا وائرس سے سب سے زیادہ متاثر ہونے والا صوبہ ہے جہاں 238 افراد اس مرض میں مبتلا ہو چکے ہیں اور ایک 77 سالہ شہری وائرس سے ہلاک بھی ہوا ہے۔