کرونا وائرس نے دنیا کو متحد کر دیا
کرونا وائرس نے دنیا بھر کے لوگوں کو بری طرح سے خوفزدہ کر رکھا ہے اور کم و بیش ہر شخص کے ذہن میں یہ سوال ہے کہ اب کیا ہو گا۔ ہر چند کہ یہ کوئی نامعلوم کا خوف نہیں ہے۔ خطرہ کیا ہے یہ سب جانتے ہیں۔ لیکن یہ کوئی نہی جانتا کہ یہ کب، کیسے اور کہاں سے حملہ آور ہو گا۔
بے یقینی کی اس صورت نے بیشتر لوگوں کو ذہنی دباؤ میں مبتلا کر رکھا ہے اور یہی ذہنی دباؤ ماہرین کے بقول خطرے میں اور اضافہ کر دیتا ہے۔
قرنطینہ میں پھنسے ایک باپ کو 'روبوٹ' بیٹی کی شادی میں لے گیا
جوئیل ینگ ان ہزاروں لوگوں میں شامل تھے جو کرونا وائرس پھیلنے کی وجہ سے، تفریحی بحری جہاز "گرینڈ پرنسس" پر ہفتوں کے لئے قید ہو گئے تھے۔
وہاں تن تنہا اپنے کیبن میں بند، ان کا واحد مشغلہ ویڈیو گیم کھیلنا، یا گھر کو یاد کرنا تھا۔ وہ ایری زونا میں، اپنی بیٹی کی جلد ہی ہونے والی شادی کے بارے میں سوچ کر دکھی ہو جاتے تھے۔ ان کا بس نہیں چلتا تھا کہ کس طرح اڑ کر وہاں پہنچ جائیں اور بیٹی کی شادی میں شریک ہو جائیں۔
پھر انہیں اس کروزشپ سے، امریکی ریاست کیلیفورنیا کے ایک میرین بیس میں منتقل کر دیا گیا، جہاں انہیں دو ہفتے قرنطینہ میں رہنا تھا۔ جولین نے جب اپنی بیٹی کو فون پر بتایا کہ وہ شادی میں نہیں شامل ہو سکیں گے، تو دونوں ہی کے آنسو بہہ نکلے۔
ان کے دوستوں اور عزیزوں نے سر جوڑ کر حل ڈھونڈ ہی نکالا۔ وہ تھا’ ٹیلی پریزنسروبوٹ‘ جس کے ذریعے جولین شادی میں شامل ہو سکتے تھے۔
اس روبوٹ کو ایری زونا میں ان کی ماں کے گھر بھیج دیا گیا۔ دلہن، دولھا اور ماں نے اسے "پاپابوٹ"کا نام دیا۔ اور اس کو خرگوش جیسے کانوں سے سجا بھی دیا۔
کرونا وائرس نے بڑے شہروں کو ویران کر دیا
کرونا وائرس کی وجہ سے دنیا بھر میں لاک ڈاؤن کیے جا رہے ہیں اور بڑے شہروں کی رونقیں ماند پڑ گئی ہیں۔ متعدد ملکوں میں کاروبار، دفاتر اور اسکول بند کر دیے گئے ہیں۔ جب کہ حکومتیں اپنے شہریوں پر زور دے رہی ہیں کہ وہ گھروں میں رہیں۔
دنیا بھر کی صورت حال کا اندازہ مقبول ویب سائٹ ارتھ کیم کا وزٹ کر کے لگایا جا سکتا ہے۔ اس ویب سائٹ پر دنیا کے بڑے شہروں میں عوامی مقامات پر لگائے گئے کیمروں سے براہ راست ویڈیوز دیکھی جا سکتی ہیں۔ ان میں کاروباری مراکز، تفریحی مقامات، مذہبی عمارات اور ساحلی علاقے شامل ہیں۔
ویب سائٹ کے فرنٹ پیج پر نیویارک شہر کے ٹائمز اسکوائر کی لائیو ویڈیو موجود ہے جو کرونا وائرس کی سب سے بہتر عکاسی کر رہی ہے۔ عام حالات میں یہ مقام شہریوں اور سیاحوں سے بھرا رہتا ہے۔ مین ہٹن کے اس مصروف ترین چوراہے کے اطراف کاروباری علاقہ اور انٹرٹینمنٹ ڈسٹرکٹ ہے۔ سال کے آغاز پر یہاں بہت بڑا جشن ہوتا ہے اور میلوں تک تل دھرنے کو جگہ نہیں ہوتی۔ آج یہاں چند افراد اور اکا دکا متحرک گاڑیاں دکھائی دے رہی ہیں۔