بھارت میں بھی لاک ڈاؤن، کرونا کے کیسز میں اضافہ
بھارت میں کرونا وائرس کے متاثرین اور اس سے ہلاک ہونے والوں کی تعداد میں اضافے کے بعد حکام نے لاک ڈاؤن کا اعلان کیا ہے۔ دارالحکومت نئی دہلی اور متعدد ریاستوں میں آج صبح چھ بجے سے لاک ڈاؤن پر عمل کیا جا رہا ہے۔ ضروری چیزوں کی دکانوں اور فارمیسیز کے علاوہ تمام بازار، ریل اور پبلک ٹرانسپورٹ بند ہے۔
ہاروی وائن اسٹائن کرونا وائرس میں مبتلا
خواتین سے جنسی زیادتی کے جرم میں قید کاٹنے والے ہالی وڈ پروڈیوسر ہاروی وائن اسٹائن بھی جیل میں کرونا وائرس میں مبتلا ہوگئے ہیں۔ ان کا کرونا کی تشخیص کا ٹیسٹ مثبت آیا ہے۔
اڑسٹھ سالہ ہاروی وائن اسٹائن ان دنوں شمالی نیویارک کی جیل میں جنسی زیادتی اور حملوں کے الزام میں 23 سال قید کی سزا کاٹ رہے ہیں۔
ایک مقامی روزنامے 'نیاگرا گزٹ' نے اپنی ایک رپورٹ میں ہاروی وائن اسٹائن کے ٹیسٹ مثبت آنے اور ان میں کرونا وائرس کی موجودگی کی تصدیق کی ہے۔ تاہم وائن اسٹائن کے ترجمان اس حوالے سے کوئی بھی تبصرہ کرنے سے انکاری ہیں۔
خبر رساں ادارے 'اے ایف پی' کے مطابق اس نے خبر کی تصدیق کے لیے نیویارک ریاست کے محکمہ جیل سے بھی رابطہ کیا تھا تاہم محکمے نے اس حوالے سے کوئی جواب نہیں دیا۔
وائن اسٹائن کو گزشتہ بدھ کو نیو یارک سٹی کے شمال مغرب میں واقع شہر بفلو کے قریب ایک جیل منتقل کیا گیا تھا۔ منتقلی سے قبل وہ جزیرہ ریکرس کے ایک جیل میں قید تھے تاہم سینے میں درد کی شکایت پر انہیں مین ہیٹن کے ایک اسپتال میں علاج کی غرض سے داخل کیا گیا تھا۔
پاکستان میں کرونا وائرس کے مریضوں کی تعداد 800 سے تجاوز
پاکستان میں کرونا وائرس کے کیسز میں مسلسل اضافہ ہو رہا ہے اور ملک بھر میں اس وائرس سے متاثرہ افراد کی تعداد 803 تک پہنچ گئی ہے۔
پاکستان کے سرکاری اعداد و شمار کے مطابق گزشتہ 24 گھنٹوں کے دوران پیر تک کرونا وائرس کے مزید تین مریض چل بسے جس کے بعد ہلاکتوں کی مجموعی تعداد چھ ہو گئی ہے۔
پاکستان میں پیر کی صبح تک کرونا وائرس کے مزید 27 نئے کیسز سامںے آئے ہیں اور اب تک اس وائرس کے چھ مریض صحت یاب ہو چکے ہیں۔
کرونا وائرس سے صوبۂ سندھ سب سے زیاد ہ متاثر ہے جہاں متاثرہ مریضوں کی تعداد 352 ہو گئی ہے۔ پنجاب میں 225، بلوچستان میں 108، خیبر پختونخوا 31، دارالحکومت اسلام آباد میں 15، پاکستان کے زیرِ انتظام گلگت بلتستان میں 71 اور کشمیر میں کرونا وائرس کا ایک کیس رپورٹ ہو چکا ہے۔
بلوچستان میں کرونا وائرس سے پہلی ہلاکت
پاکستان کے صوبۂ بلوچستان میں کرونا وائرس سے پہلی ہلاکت ہوئی ہے جب کہ صوبے میں پیر کو مزید 4 افراد میں اس وائرس کی تشخیص ہوئی ہے جس کے بعد متاثرہ افراد کی تعداد 108 ہو گئی ہے۔
کوئٹہ سے وائس آف امریکہ کے نمائندے عبدالستار کاکڑ کے مطابق صوبائی حکومت کے ترجمان لیاقت شاہوانی نے بتایا ہے کہ اتوار اور پیر کی درمیانی شب کوئٹہ کے فاطمہ جناح چیسٹ اینڈ جنرل اسپتال میں کرونا وائرس میں مبتلا 65 سالہ شخص دوران علاج جان کی بازی ہار گیا۔
متاثر مریض کا تعلق کوئٹہ سے تھا جو ایران کے علاقے مشہد میں زیارت کے بعد تفتان قرنطینہ کیمپ آیا تھا۔
انہوں نے مز ید بتایا کہ صوبے میں اب تک 1950 افراد کی اسکریننگ کی گئی ہے جن میں سے 1405 مشتبہ افراد کے خون کے نمونے صحیح نہ ہونے کے باعث مزید ٹیسٹس کے لیے لیبارٹری بھجوا دیے ہیں۔ ان کے بقول، تفتان میں 402 اور کوئٹہ میں 26 افراد قرنطینہ میں موجود ہیں۔