- By روشن مغل
پاکستان کے زیر انتظام کشمیر میں 21 دن کے لیے لاک ڈاؤن
پاکستان کے زیر انتظام کشمیر میں پیر کی شب 12 بجے سے 21 دن کے لیے لاک ڈاؤن کا اعلان کر دیا گیا ہے۔
تین ہفتوں کے لیے لاک ڈاون کا اعلان وزیراعظم راجہ محمد فاروق حیدر خان نے کیا۔ اس دوران عوام کے غیرضروری سفر کرنے اور باہر نکلنے پر پابندی ہو گی جب کہ ہر قسم کی ٹرانسپورٹ مکمل معطل رہے گی۔
وزیر اعظم راجہ فاروق حیدر نے کہا کہ ناگزیر حالات میں سفر کرنے کے لیے خصوصی پاسز جاری کیے جائیں گے کھانے پینے کا سامان لانے کے لیے گھر کے ایک فرد کو اجازت ہو گی۔
ان کا کہنا تھا کہ عوام کی حفاظت کے لیے یہ اقدامات اٹھائے گئے ہیں۔ یہ کرفیو نہیں ہے بلکہ حفاظتی انتظامات ہیں۔
پاکستان میں غذائی اشیا کی قلت نہیں ہے: وزیر خوراک
وفاقی وزیر فوڈ سیکیورٹی خسرو بختیار نے معاون خصوصی صحت ظفر مرزا اور نیشنل ڈزاسٹرمینجمنٹ (این ڈی ایم اے) کے چیئرمین لیفٹننٹ جنرل افضل کے ہمراہ پریس کانفرنس کرتے ہوئے کہا ہے کہ ملک میں اس وقت وافر مقدار میں خوراک کے ذخائر موجود ہیں۔
خسرو بختیار کا کہنا تھا کہ اس وقت گندم کے بڑے ذخائر ملک میں موجود ہیں جب کہ آئندہ ایک ہفتہ میں گندم کی کٹائی سندھ میں شروع ہو رہی ہے جس کے بعد مزید ذخائر جمع ہوجائیں گے۔
انہوں نے مزید کہا کہ اس کے ساتھ ساتھ پاکستان کے پاس 70 لاکھ ٹن چاول موجود ہے جب کہ ضرورت 35 لاکھ ٹن ہے۔ یعنی پاکستان کے پاس ضرورت سے دگنی مقدار میں چاول موجود ہیں۔
ان کا کہنا تھا کہ دالوں کی بین الاقوامی سطح پر قیمتوں میں کمی آئی لیکن لوگ ضرورت سے زیادہ خریداری نہ کریں ورنہ ڈیمانڈ زیادہ ہونے سے قیمتیں بڑھ سکتی ہیں۔
چئیرمین این ڈی ایم اے لیفٹننٹ جنرل مظفر افضل کا کہنا تھا کہ بیرون ملک سے طبی آلات منگوائے جا رہے ہیں۔ چین سے 120 وینٹی لیٹر آئندہ جمعے تک پہنچ جائیں گے جب کہ 20 ٹن طبی سامان بھی پاکستان پہنچ رہا ہے۔
ان کا کہنا تھا کہ اسپتالوں میں مزید انتظامات کیے جا رہے ہیں اور لوگوں کو قرنطینہ میں رکھنے کے لیے مختلف اقدامات کیے جا رہے ہیں۔
- By سہیل انجم
بھارت کے 80 اضلاع میں لاک ڈاؤن، پارلیمنٹ کا اجلاس غیر معینہ مدت کے لیے ملتوی
بھارت کے 80 اضلاع میں کرونا وائرس پھیلنے سے روکنے کے لیے جہاں 31 مارچ تک لاک ڈاون کا اعلان کیا گیا ہے وہیں پارلیمنٹ کا اجلاس بھی غیر معینہ مدت کے لیے ملتوی کر دیا گیا۔
اجلاس تین اپریل تک چلنے والا تھا۔ ترنمول کانگریس سمیت متعدد سیاسی جماعتوں نے پارلیمانی اجلاس میں شرکت سے خود کو دور رکھا تھا۔
سپریم کورٹ نے سماجی دوری قائم رکھنے کے لیے وکلا کے تمام چیمبرز کو بند کرنے کا حکم دیتے ہوئے کہا ہے کہ صرف اہم معاملات کی ویڈیو کانفرنسنگ کے ذریعے سماعت ہوگی۔
دہلی ہائی کورٹ اور ضلعی عدالتوں میں کام کاج 4 اپریل تک معطل کر دیا گیا ہے۔
بھارتی پنجاب میں کرفیو نافذ
بھارتی پنجاب میں ریاستی حکومت نے لاک ڈاؤن کے سلسلے میں عدم سنجیدگی کے مشاہدے کے بعد انتہائی سخت قدم اٹھاتے ہوئے ریاست میں کرفیو نافذ کر دیا ہے۔
پنجاب میں کرفیو 31 مارچ تک جاری رہے گا۔ پنجاب کرفیو نافذ کرنے والی بھارت کی پہلی ریاست بن گئی ہے۔
احمد آباد میں اتوار کے روز 'جنتا کرفیو' کی خلاف ورزی کرنے پر 40 افراد کے خلاف قانونی کارروائی کی گئی ہے۔ یہ لوگ شام پانچ بجے ڈاکٹروں اور دیگر طبی عملہ کو خراج تحسین پیش کرنے کے لیے تھالیاں اور دیگر برتن بجاتے ہوئے سڑکوں پر جلوس کی شکل میں آئے تھے۔
- By یوسف جمیل
بھارتی کشمیر میں لاک ڈاؤن کامیاب بنانے کے لیے ڈرونز کا استعمال
بھارت کے زیرِ انتظام کشمیر کے گرمائی صدر مقام سرینگر سمیت دوسرے شہروں میں کرونا وائرس کے خطرے کے پیش نظر جاری لاک ڈاؤن کو کامیاب بنانے کے لیے قانون نافذ کرنے والے ادارے کیمرے لگے ڈرون استعمال کر رہے ہیں۔
ڈرون استعمال کرنے کے حوالے سے ایک اعلیٰ پولیس عہدیدار وجے کمار نے بتایا کہ ان ڈرونز کے ذریعے جوں ہی کسی جگہ لاک ڈاؤن کی خلاف ورزی کا علم ہوتا ہے تو پولیس مناسب کارروائی کے لیے فوری طور پر اس مقام پر پہنچ جاتی ہے۔
اس دوران پولیس نے لاک ڈاؤن کی خلاف ورزی کر کے سڑکوں پر جمع ہونے کے الزام میں تین درجن سے زائد افراد کو گرفتار کر لیا ہے۔ عہدیداروں نے کہا ہے کہ خلاف ورزی کے بڑھتے ہوئے واقعات کے پیشِ نظر پابندیوں کو مزید سخت کیا جائے گا-
ان کا کہنا تھا کہ ان ڈرونز کے ذریعے لوگوں کو اپنے آپ کو گھروں تک محدود کرنے کی اہمیت اور ضرورت کے بارے میں پیغامات بھی پہنچائے جا رہے ہیں۔